Hoggaamiyaha Dowladda Koonfur Galbeed Soomaaliya, Sheekh Aadan Maxamed Nuur (Madoobe), ayaa magaalada Baydhabo kaga qeybgalay munaasabad lagu soo bandhigay Qorshaha Isbeddelka Dowladda Koonfur Galbeed ee 2026–2031 (STP) oo dib-u-eegis lagu sameeyay.
Qorshahan oo ay soo qabanqaabisay Wasaaradda Qorsheynta Dowladda Koonfur Galbeed ayaa qeexaya jihada iyo mudnaanta maamulka shanta sano ee soo socota, iyadoo diiradda lagu saarayo horumarinta adeegyada bulshada, kobcinta dhaqaalaha, xoojinta hay’adaha dowladda iyo dardargelinta mashaariicda horumarineed.
Sheekh Aadan Madoobe ayaa sheegay in qorshuhu uu muhiim u yahay xaqiijinta himilooyinka Dowladda Koonfur Galbeed iyo hirgelinta horumar waara oo wax ka qabanaya baahiyaha bulshada.
Waxa uu carrabka ku adkeeyay muhiimadda ay leedahay in qorshayaasha horumarineed lagu saleeyo baahiyaha dhabta ah ee shacabka, isla markaana la xoojiyo wada-shaqeynta dowladda, bulshada rayidka ah, hay’adaha Qaramada Midoobay, bah-wadaagta horumarinta iyo dhinacyada kale ee ay khuseyso hirgelinta qorshaha.
STP 2026–2031 ayaa mudnaanta siinaya waxbarashada iyo caafimaadka, fursadaha dhaqaale iyo shaqo-abuurka, horumarinta kaabeyaasha dhaqaalaha, maamulka wanaagsan iyo xoojinta hay’adaha dowladda, iyo sidoo kale adkeysiga bulshada si wax looga qabto caqabadaha bani’aadannimo iyo kuwa ka dhasha isbeddelka cimilada.
Munaasabadda waxaa ka qeybgalay xubno ka tirsan Golaha Wasiirrada Koonfur Galbeed, xildhibaano, Agaasimaha Madaxtooyada, Guddoomiyaha Gobolka Bay, Guddoomiyaha Degmada Baydhabo, la-taliyeyaasha Madaxweynaha iyo mas’uuliyiin kale.
Ugu dambeyn, Hoggaamiye Sheekh Aadan Maxamed Nuur (Madoobe) ayaa saxiixay Qorshaha Isbeddelka Dowladda Koonfur Galbeed ee 2026–2031, kaas oo noqonaya qorshaha hagaya mudnaanta horumarineed ee maamulka muddada shanta sano ee soo socota.
