Kulan looga hadlay xaaladda amniga iyo howlgallada ka socda Gobolka Shabeellaha Hoose ayaa lagu qabtay degmada Afgooye, iyadoo uu shir guddoominayay Wasiir Ku-xigeenka Wasaaradda Amniga, Mudane Maxamed Yuusuf Maxamed.
Kulanka ayaa diiradda lagu saaray xaaladda guud ee amniga gobolka, howlgallada socda iyo dadaallada Ciidanka Xoogga Dalka Soomaaliyeed ay ka wadaan deegaanada Gobolka Shabeellaha Hoose.
Wasiir Ku-xigeenka ayaa warbixin ka dhageystay Guddoomiyaha Gobolka Shabeellaha Hoose, Cabdifataax Sayid Axmed Siidii, kaas oo ka hadlay xaaladda amni, howlgallada ciidamada iyo horumarrada laga sameeyay sugidda amniga deegaanada gobolka.
Guddoomiye Siidii ayaa sheegay in ciidamada ay howlgallada ka socda gobolka ka gaareen guulo muhiim ah, isagoo si gaar ah u xusay dagaalladii dhowaan ka dhacay deegaanada Basra iyo Baqdaad ee Gobolka Shabeellaha Hoose.
Kulanka waxaa sidoo kale ka qeyb galay wasiiro, xildhibaano ka tirsan Golaha Wakiillada, Guddoomiye Ku-xigeennada Gobolka ee Siyaasadda iyo Qorsheynta, maamulka degmada Afgooye iyo saraakiil ka tirsan laamaha amniga.
Kulankan ayaa qeyb ka ah dadaallada lagu qiimeynayo xaaladda amni ee Gobolka Shabeellaha Hoose iyo xoojinta wada shaqeynta maamulka iyo hay’adaha amniga.
