Maamulka Koonfur Galbeed oo xoojinaysa amniga Baydhabo iyo magaalooyinka kale
Dowladda Koonfur Galbeed Soomaaliya ayaa sheegtay inay xoogga saarayso sugidda amniga magaalada Baydhabo iyo guud ahaan magaalooyinka ku yaalla deegaannada maamulka.
Waddooyinka waaweyn ee laga soo galo magaalada Baydhabo ayaa la sheegay in laga sameeyay xarumo ciidan, iyadoo halkaas la geeyay ciidamo cusub oo dhawaan la qalabeeyay.
Ciidamadan ayaa laga kala qoray gobollada Bakool, gaar ahaan magaalooyinka Xudur iyo Waajid, iyo sidoo kale magaalada Baydhabo.
Wasiirka Amniga Koonfur Galbeed, Isaaq Maxamed Isaaq (Korsaar), ayaa dhawaan hadallo uu ku baahiyay baraha bulshada ku sheegay in dowladdu ay ballanqaaday in aan mar dambe dagaallo ka dhicin magaalada Baydhabo.
Wasiirka ayaa sidoo kale sheegay in ciidamada Koonfur Galbeed ay qaadi doonaan howlgallo ka dhan ah maleeshiyaadka taageera hoggaamiyihii hore ee Koonfur Galbeed, Cabdicasiis Xasan Maxamed Laftagareen, iyo kooxda Al-Shabaab.
Hadallada wasiirka ayaa ku soo beegmaya xilli Baydhabo iyo deegaannada ku dhow ay ka jiraan xiisado amni iyo siyaasadeed.
Dowladda Koonfur Galbeed ayaa sheegtay in tallaabooyinkan ay qayb ka yihiin qorshaha lagu xoojinayo amniga, laguna ilaalinayo shacabka iyo xarumaha muhiimka ah.
