Wararka ka imanaya magaalada Garowe ee xarunta Maamul goboleedka Puntland ayaa sheegaya in ciidamada Booliska ay xabsiga dhigeen siyaasiyiin iyo ganacsato dhowaan ugaga dhowaaqday magaalada Garowe Madasha Samatabixinta Puntland.
Siyaasiyiinta iyo ganacsatada la xirey ayaa waxaa ka mid ah C/rixmaan Siciid Maxamud (Dhegawayne),Daahir Ciiro iyo Feysal Faarax Cali. Dhamaan dadka la xirey ayaa hore xilal ugaga soo qabtay dowlada dhexe iyo maamul goboleedka Puntland waxana ay ka soo horjeesteen shirka Kismaayo.
C/maan Dhagaweyne oo la hadlay weriye ka tirsan VOA laanta afka Soomaaliga ayaa ku tilmaamay xarigooda inuu yahay mid xoriyada hadalka oo ay san wax dambi ah gelin.
Guddoomiyaha Gobolka Nugaal Cumar Cabdulaahi Farawayne ayaa sheegay in amarka lagu xiray ragan uu bixiyey Guddiga Nabadgalyada gobolka Nugaal isla markaana ay ku eedaysan yihiin khalkhal galin Amniga iyo xasiloonida Puntland . Siyaasiyiinta iyo xubnaha la xirayay ayaa dhawaan dhaliilo warbaahinta u mariyey madaxwayne Gaas iyo xukumadiisa .
