{WARSANRADIO}Siyaasiga Salaad Cali Jeelle ayaa taageeray heshiiskii Soomaaliya iyo Itoobiya galeen ee ku saabsanaa maalgashiga afar dekadood oo Itoobiya maalgashaneyso, isagoo ku tilmaamay inuu yahay guul u soo hoyatay Soomaaliya.
“Heshiiskaas waa guul u soo hoyatay Soomaaliya, oo loo baahan yahay in dowladda lagu dhiira geliyo”ayuu yiri Salaad Cali Jeelle oo Wariyeyaasha kula hadlayay magaalada Muqdisho.
Waxaa uu sheegay in heshiiskaas ay jiraan dad fasiraad qaldan ka bixiyay oo shacabka Soomaaliyeed marin habaabiyay, waxaana uu tibaaxay in dadkaas dhib ku yihiin dowladnimada.
“Dad waxaa jira oo qeylinaya oo inay dadka marin habaabiyaan raba, fasiraad qaldan siinaya shacabka iyo caalamka, waajibaadka dowladnimada waxaa looga baahan yahay in qofkii umadda dhibaato ku ah la ifiyo oo farta lagu fiiqo”ayuu yiri Salaad Cali Jeelle oo ka mid ah siyaasiyiinta taageersan dowladda uu hoggaamiyo Madaxweyne Farmaajo.
Waxaa uu sheegay in lagama maarmaan ay tahay in dalalka deriska nabad lagu wada noolaado, waa mid guul u soo hoyatay waa mid loo baahan yahay in dowladda lagu dhiira geliyo.
Siyaasiyiin iyo Xildhibaan ka tirsan Golaha Shacabka ayaa si adag ugafal celiyay heshiiskii Sabtidii la soo dhaafay dhex maray Madaxweyne Farmaajo iyo Ra’iisul Wasaaraha oo ka mid ahaa maalgashiga afar dekadood oo Soomaaliya ku yaalla oo ay Itoobiya maalgashaneyso.
