Xarumaha codbixinta ee dalka Burundi ayaa saaka aroornimadii la furay, ku dhawaad shan milyan oo qof ayaa maanta la rajaynayaa inay codkooda halkaas ka dhiibtaan.
Codbixiyayaasha ayaa dooranaya madaxweynaha, xubnaha baarlamaanka iyo golaha deegaanka.
Todobo musharax ayaa u taagan inay badelaan madaxweyne Pierre Nkurunzinza, oo muddo dheer hayay xilka madaxweynaha ee dalkaas.
Muwaadiniinta jooga dalka dibaddiisa ayaanan ka qayb qaadan doonin doorashada maanta dhacaysa, taasi oo la sheegay in sababta ay tahay xanuunka corona ee hadda dunida faraha ba’an ku haya.
Xarumaha codbixinta ayaa la xiri doona galabta iyada oo la rajaynay in natiijooyinka la shaaciyo 25 bisha May.
Guddiga doorashada ayaa mamnuucay isticmaalka teleefonnada iyo kaamirada, waxaa sidoo kale la xiray isticmaalka baraha bulshada ku xirriirta.
