Ciidamada Daraawiishta dowlad Goboleedka Puntland ayaa saacadihii dhaafay waxaa ay howlgalo qorsheysan oo ka dhan ahaa dagaalamayaasha Al-shabaab ka sameeyeen deegaano ka tirsan Buuraleyda silsiladda Golis ee Gobolka Bari ee Maamulkaas.
Warar la helayo ayaa waxaa ay sheegayaan in howlgalka inta uu socday uu iska horimd dhexmaray Ciidanka Maamulka Puntland iyo Al-shabaab, isla markaana iska horimaadka uu ka dhashay khasaaro kala duwan.
Saraakiisha hoggaamineysay howlgalka Daraawiishta ayaa laga soo xigtay in weerar ku qaadeen Saldhigyo Shabaabka uga sugnaayeen buureleyda Dhagax-dhaabur iyo Habar-hagoogan ee silsiladda Golis gaar ahaan Galgala, ayna qabsadeen Saldhigyo halkaas uga sameeysnaa Al-shabaab.
Sidoo kale Saraakiisha ayaa intaas kusii dartay in weli howlgalka uu socdo, isla markaana uu jiro khasaaro lagu gaarsiiyay Shabaabka, waa sida hadalka u dhigeen Saraakiisha oo aan faah faahin intaas ka badan ka bixin howlgalka la fuliyay.
Ciidamada Daraawiishta dowlad Goboleedka Puntland ayaa dhowr jeer oo horey howlgalo ka dhan ahaa Al-shabaab sidaan oo kale uga sameeyay deegaano ka tirsan Buuraleyda silsiladda Golis ee Gobolka Bari, iyadoona dhinacyada ay dhexmareen dagaalo khasaaro kala duwan dhaliyey.
