Ra’iisul Wasaare ku xigeenka Xukuumadda Federaalka Soomaaliya, Saalax Axmed Jaamac, ayaa maanta kulan gaar ah la yeeshay Danjiraha cusub ee UK u fadhiya Soomaaliya, Mr. Charles Nicholas.
Kulanka ayaa waxaa looga hadlay xoojinta iskaashiga u dhaxeeya labada dal, gaar ahaan dhinacyada amniga, siyaasadda, doorashooyinka iyo dardar-galinta Mashaariicda horumarineed ee UK ay ka taageerto Soomaaliya.
Ra’iisul Wasaare ku xigeenka ayaa Danjiraha la wadaagay warbixinno la xiriira dagaalka AS, hirgelinta doorashooyin qof iyo cod ah oo ay dadweynuhu ku soo doortaan madaxda hoggaamineysa, taas oo hadda qeybo kamid ah dalka ay ka socdaan diiwaangelinta codbixiyaasha doorashooyinka.
Danjiraha UK ee Soomaaliya Mr. Nicholas King, ayaa soo dhaweeyey shirarka wada-hadalka ee u dhaxeeya Dowladda Federaalka Soomaaliya, saamileyda siyaasadda iyo qeybaha bulshada ee lagu kaabayo dowlad-dhiska Soomaaliya, horumarinta amniga iyo dagaalka AS.
Kulanka ayaa ku soo aadaya xilli Dowladda Soomaaliya ay ku dadaaleyso dardar galinta dagaalka AS iyo qabashada doorashada qof iyo codka ah.
