Baydhabo, 14 Sebtembar 2026 — Taliyaha Ciidanka Dhulka ee Xoogga Dalka Soomaaliyeed, General Sahal Cabdullaahi Cumar, ayaa weli ku sugan magaalada Baydhabo, halkaas oo uu ka wado howlo la xiriira xoojinta amniga iyo isku-dubbaridka ciidamada dowladda iyo kuwa Koonfur Galbeed.
General Sahal ayaa Baydhabo uga qaybgalaya kulamo iyo howlo lagu qiimeynayo xaaladda amni ee magaalada iyo sidii loo xoojin lahaa wada-shaqeynta Ciidanka Xoogga Dalka Soomaaliyeed iyo ciidamada Koonfur Galbeed.
Qorshayaasha socda ayaa diiradda lagu saarayo hawlgallo wadajir ah oo lagu sugayo amniga Baydhabo iyo deegaanada ku teedsan, iyadoo la isku-dubaridayo cutubyo ka tirsan Ciidanka Xoogga Dalka, Daraawiishta iyo Birmadka Koonfur Galbeed.
Dowladda Federaalka iyo maamulka Koonfur Galbeed ayaa horey u sheegay in ciidamo taageersan madaxweynihii hore ee Koonfur Galbeed, Cabdicasiis Xasan Maxamed (Laftagareen), ay xiriir la sameeyeen Al-Shabaab. Eedeymahaas waxaa horey u beeniyay dhinacyada mucaaradka ee taageera Laftagareen.
General Sahal Cabdullaahi, oo Sabtidii gaaray Baydhabo, ayaa sidoo kale ciidamada geeyay agab loogu talagalay howlaha amniga, iyadoo maalintii Axadda uu kormeer ku sameeyay ciidamada ku sugan fariisimaha iyo goobaha difaaca ee afaafka hore ee magaalada.
Saraakiisha ciidamada ayaa hadda diiradda saaraya xoojinta difaaca magaalada, isku-xirka cutubyada kala duwan iyo ka hortagga weerarro laga soo abaabulo deegaanada ku dhow Baydhabo.
Howlaha Taliyaha Ciidanka Dhulka ee Baydhabo ayaa kusoo aadaya xilli magaalada iyo guud ahaan gobolka Baay ay ka socdaan dadaallo lagu xoojinayo amniga iyo diyaarinta howlgallo wadajir ah oo ka dhan ah khataraha amni ee ka jira gobolka.
