Admin

Waxaa maanta dib u dhaca uu ku yimid jadwalka doorashada golaha shacabka oo ay horey u shaaciyeen guddiga doorashooyinka heer Federaal, kaasi oo qorshuhu ahaa in maanta ay bilaabato qabashada doorashada golaha shacabka ee Baarlamaanka Soomaaliya.

Dib u dhacan ayaa loo sababaynayaa in xiligan aysan socon tillaabo lagu qabanayo doorashada golaha shacabka, marka laga reebo 9 kursi oo guddiga soomaaliland ay soo saareen doorashadiisa, islamarkaana horayna ay u qabteen laba kursi oo ka mid ah golaha shacabka.


Sidoo kale ma jiraan dadaalo ay wadaan madaxda dowlad goboleedyada, kaasi oo ku aadan in si deg deg ah loo qabto doorashada golaha shacabka, sida ay sheegeen dadka falanqeeya arrimaha siyaasada Soomaaliya.


Dhawaan guddiga doorashooyinka ayaa sheegay in Jadwalka doorashada ee golaha shacabka lasoo gabagabeyn doono 24ka bisha soo socota.

Lama oga sida ay ku qabsoomi doonto doorashada golaha shacabka ee Baarlamaanka Soomaaliya.


Beesha caalamka ayaa ka digaysa in doorashooyinka golaha shacabka ay dib u dhacdo, taasi oo khal khal gelin karta howlaha amniga iyo u gargaaridda dadka tabaalaysan, sida lagu sheegay warsaxaafadeedka

Inkastoo Ra’iisal Wasaaraha Xukuumadda, Maxamed Xuseen Rooble uu booqasho ku jooggo Magaalada Dhuusamareeb, isla-markaana ay weli taagan tahay xiisadda Galmudug kala dhaxeysa Ahlu Sunnada Gobolada Dhexe ayaa waxaa soo baxaya warar sheegaya muddada uu ku sugan yahay magaaladaasi inaanu wax wada hadal ah ku dayi doonin Hoggaanka Ahlu Sunna.

Sarkaal ka tirsan Xafiiska Ra’iisal Wasaaraha ayaa Universaltv u sheegay inaanu qorshaha Rooble ee Dhuusamareeb qayb ka ahayn in uu u kala dab qaado Galmudug iyo Ahlu Sunna.

“Haba yaraatee wax la xiriira arrinta Ahlu Sunna Waljameeca maanu Ra’iisal Wasaaruhu u tegin Magaalada Dhuusamareeb. Arrimo ugu muhiimsan midda doorashada ayuu u tegay magaaladaasi.” Ayuu yiri Sarkaalkan oo codsaday inaanan magaciisa Warbaahinta loo adeegsan.

Waxa kaloo uu yiri “Waa laga yaabaa siyaasiyiinta xil raadiska ah ee ku qulqulaya magaaladaasi inay Ra’iisal Wasaaraha ka codsadaan bal inuu hoos u fiiriyo tabashada Ahlu Sunna, laakiin safarkiisa Dhuusamareeb arrintaa ayada ah qayb kama ahan.”

Iyadoo Hoggaanka Ahlu Sunna ay si weyn u daneynayaan in xubno ku yeeshaan Xildhibaanada Golaha Shacabka ee deegaan doorashadoodu tahay Galmudug ayaa waxaa haddana muuqata in Villa Somalia iyo Madaxtooyada Galmudugba ay taasi ka biyo diidan yihiin. Tani ayay dadka deegaanka qaarkii dareen ka muujinayaan in isku dhacyo hor leh ka abuurto Galmudug.

Ahlu Sunna oo dhowr iyo toban sano ka arrimineysay Gobolada Dhexe ayaa door muuqdo ku laheyd labadii xilli doorasho ee ugu dambeysay ee dalka laga qabtay, sanadihii 2012 iyo 2016.

Mas’uuliyiinta dalka Spain ayaa sheegay in siddeed qof oo tahriibayaal ah ay dhinteen kaddib markii doonidii ay la socdeen ay muddo toddobaad ka badan dul-sabaynaysay badweynta Atlaantigga ee koonfurta jasiiradda Gran Canaria.

Sidoo kale kooxaha Gurmadka deg dega ah ayaa saacadihii hore ee Axadda maanta loogu yeeray doon ay saarnaayeen laba iyo lixdan qof.

Toddoba qof ayaa hore u dhintay, halka qof siddeedaadna wuxuu dhintay goor dambe.Qaar ka mid ah kuwa badbaaday ayaa lagu qaaday diyaarad helikobter ah sababtoo ah xaalladooda ayaa liidatay. Habeenimadii Sabtida ee aynu ka soo gudubnay-na, soddon iyo lix qof oo tahriibayaal ah ayaa laga soo badbaadiyay doon kale oo badda ah.

Jasiiradaha Canary waa marinka ugu weyn ee muhaajiriinta Afrikaanka ah ee isku dayaya inay galaan wadamada Yurub.

Ku dhawaad 700 maxbuus ayaa ku eeriyootay kadib markii xabsi ku yaala dalka Ekwadoor ay ku dhex dagaalameen maxaabiis ku xirneyd.

Wararku waxay sheegayaan in maxaabiis ku xiran xabsi ku yaala magaalada Guyaaquwiil ay dhexdooda labo dhinac u kala safteen taasoo keentay inay geeriyoodaan 69 maxbuus.

Rabashadaha ayaa xoogaystay tan iyo xalay taasoo keentay inay xabsiga la wareegaan maxaabiistu, Wasaaradda arrimaha gudaha dalka Ekwador ayaa sheegtay hadda xabsiga ayaa ciidamadu la wareegeen xaaladuna degantahay Illaa Sodomeeyo maxbuus oo dhaawac ah ayaa la geeyay xarumaha caafimaadka.

Sidaan oo kale dagaal maxaabiista ku dhex maray isla xabsigaan bishii September ee sanadkaan ayaa sababay dhimashada in ka badan 100 maxbuus

Ra’iisul Wasaaraha Xukuumadda Federaalka Soomaaliya Maxamed Xuseen Rooble ayaa xafiiskiisa ku qaabilay Agaasimaha Bangiga Adduunka ee Geeska Afrika Mr. Keith Hansen iyo wefdi uu hoggaaminayo oo ay ka wada hadleen dardargelinta mashaariicda horumarineed ee Bangiga Adduunku ka fuliyo Soomaaliya iyo kuwa qorsheysan.

Ra’iisul Waaaaraha ayaa  uga mahadceliyay Bangiga Adduunka taageeradiisa hay’adaha dowladda iyo horumarinta midaamka maaliyadeed ee dalka.

Ra’iisul Wasaaraha Xukuumadda Federaalka Soomaaliya ayaa dhawaanahan waday kulamo kala duwan oo ku aaddan doorashooyinka dalka,isagoo kulmo la qaatay qaar ka mid ah Saaxiibada Beesha caalamka.

Dowladda Jabuuti ayaa maanta sheegtay in dhulkeeda aan loo adeegsan doonin farogelin dagaal oo lagu sameeyo dalalka deriska la ah.

Hadalkan ayaa yimid kadib markii Jeneral ka tirsan ciidamada Mareykanka uu wareysii uu siiyey BBC-da walaac uga muujiyey saameynta uu dagaalka Ethiopia ku yeelan karo gobolka, islamarkaana ciidamada Mareykanka ee Jabuuti “ay diyaar u yihiin inay ka jawaabaan xasaradda.”

Wasiirka Arrimaha Dibadda Maxamuud Cali Yuusuf ayaa qoraal uu soo dhigay twitter-ka ku yiri “Jeneraal Willilam Zana, taliyaha saldhigga Lemonier [ee Jabuuti], wuxuu wareysi uu siiyey BBC-da ku sharxay sida ciidamada Mareykanka ee ku sugan Jabuuti ay u fuliyaan howlgallo lagula dagaalamayo argagixisada iyo ilaalinta muwaadiniintooda haddii loo baahdo daad-gureyn.”

“Dadka qaar ayaa walaac ka muujiyey in dhulka Jabuuti loo adeegsanayo farogelin dagaal oo lagu sameeyo dalalka deriska la ah. Tani ma dhici doonto sababtoo ah dowladda Jabuuti waxaa ka go’an xiriirka ay la leedahay deriskeeda.”

Maxamuud Cali Yuusuf ayaa sheegay in Jabuuti ay qadarineyso iskaashiga muhiimka ah ee ay la leedahay Mareykanka, “ayna hubanti tahay in iskaashigan aanu aheyn mid ka dhan dal kasta oo ay noqoto.”

Saldhigga ciidamada Mareykanka ee Jabuuti ayaa inta badan loo adeegsadaa in laga qaado weerarada iyo howlgallada ka dhanka argagixisada, oo laga fuliyo meelo ay ka mid tahay Soomaaliya.

Ra’iisul Wasaaraha Xukuumadda xilgaarsiinta Maxamed Rooble ayaa Gudsiga doorashooyinka Gobolada Waqooyi uga mahad celiyay shaacinta jadwalka doorashada 9 kursi oo ka tirsan Golaha Shacabka BFS iyagoo horayna u qabtay doorashada 2 xildhibaan.

” Waxaan ku boorrinayaa dhammaan dowlad-goboleedyada in ay bilaabaan doorashada Golaha Shacabka si doorashada xildhibaannadu noogu soo idlaato ka hor dhammaadka sanadka ayuu yiri” RW Rooble.

Waxaa naga go’an fududeynta doorasho hufan oo nabdoon, taas oo nooga baahan iskaashi iyo in aan wadajir uga shaqeyno.

Waxaa goordhweyd la shaaciyay  Jadwalka Doorashada sagaal kursi oo Golaha Shacabka ka soo galayaGobolada waqooyi ee Somaliland,waxaana si toos ah doorashada kuraastaasi looguda gali doonaa Maalmaha soo socda.\

Hoos ka akriso Jadwalka

Qoraal ka soo baxay ciidamada AMISOM ayaa lagu xaqiijiyay in maxkamad milatari ay ku xukunta 5 askari u dhalatay dalka Uganda dil toogasho ah iyo xabsi dheer kadib markii ay ku cadaatay inay dileen dad rayid ah.
Warka ka soo baxay ciidamada AMISOM ayaa lagu sheegay in askarta xukunka ku dhacay la geyn doono dalka Uganda si ay halkaas loogu fuliyo xukunka.

Hase yeeshee warar soo baxayay shalay ayaa sheegayay in labada askari ee dilka lagu xukumay lagu fulinayo xukunkooda magaalada Muqdisho.

Askarta xukunka lagu ridey ayaa bartamihii bishii Augost ee sanadkan waxa ay ku dileen deegaanka Golweyn muwaadiniin Soomaaliyeed oo rayid ah.

Isbaheysiga Taageera Ciidamada Dowladda Yeman ayaa ku dhawaaqay in 24-kii saac ee lasoo dhaafay ay fuliyeen 42 weerar oo lagu bartilmaameedsanayay Maleeshiyadkaa Xuuthiyiinta ee ku sugan magaalada Sirwaax ee galbeedka Ma’rib iyo Al-bayda oo iyadana dhanka koonfureed kaga beegan Ma’rib.

Maanta ayuu Isbaheysiga sheegay in howlgalkan  lagu burburiyay 17 ka mid ah gaadiidka dagaalka, laguna dilay 186 ka mid ah maleeshiyaadkii u dagaalamayay Kooxda Xuutiyiinta.

Sidoo kale, furimaha koonfureed ee Marib ayaa Sabtidii shalay waxaa ka dhacay dagaallo xooggan oo u dhexeeya ciidamada Yeman iyo maleeshiyaadka Xuutiyiinta, halkaas oo la sheegay in lagu jibiyay Maleeshiyaadka Xuutiyiinta.

Ciidamada dowladda ee ku sugan Koonfurta Mariib ayaa la sheegay in ay iska caabiyeen weerarro ay maleeshiyaadkaasi ku soo qaadeen, iyagoo isku dayay inay dib u soo ceshtaan goobo horay loogala wareegay.

Ilo-wareedyo gudaha Yeman ah ayaa sheegaya in Maleeshiyaad badan oo u dagaalamaya Xuutiyiinta la dilay, Iyadoo  sidokale Ciidamada Isbaheysiga ay burburiyeen Taangiyo iyo tiro kamid ah gaadiid dagaal oo ay wateen Xuutiyiinta.