Warsan Radio

Beeraleyda ka soo barakacday abaaraha gobolka Baay ayaa wajahaya xaalad adag, iyadoo qaar badan oo ka mid ah ay ku nool yihiin xeryaha barakacayaasha ee magaalada Baydhabo. Xeryahani ayaa buux dhaafiyay, waxaana sii kordhaya dadka ku soo biiraya.

Kaamka Idaale one  oo ku yaal duleedka Baydhabo, waxaa ku nool 512  qoys oo abaaraha ka soo barakacay. Edoy Aadan ibraahim , oo ka mid ah haweenayda kaamkaas ku nool, ayaa sheegtay inay ka soo barakacday tuulada Buulo gaduud  oo ku taal gobolka Baay, kadib markii roobabkii Deerta  ee sanadkii hore aysan u Bixin  dalagyadii beeraha soo goos lahaayeen  Hadda waxay ku nool yihiin xaalad adag, iyadoo qoyskeedu ay ku noolyihiin hal cunto maalintii, inta badan kaalmada deriska.

Sidoo kale, boqollaal beeraley ah oo ku nool gobollada Baay iyo Bakool ayaa muddo saddex sano ah ka soo barakacay abaaraha, waxayna hadda Xaalada Adag kaga Nool yihiin kaamamka Duleedka Magaalada Baydhabo     .Abdikariin Xaaji Xuseen   , oo 60  jir ah,  Ku Nool kaamka Idaale one ayaa sheegay in Asaga iyo Qoskiisa oo gaaray  10 qof Asaga,  8 Caruur ah iyo Hooyadooda  in Xeligani Xaalada Adag ay ku nool yihiin. Abdikariin sidoo kale Sheegay In Nolosha qooska Ku maareeyo Xoobo uu ku soo guray Gaari Dameer uu Asaga leeyahay Balse aysan ku filaneyn Maareenta Nolosha qooskiisa. Waxaan uu Maamulka Kgs iyo Hay,daha Samfalka in ay Garab siyaan si uu ugu Baxo Noloshaan Adag ee uu hada ku sugun yihiin Asaga iyo Qoskiisa.

Guddoomiyaha Beeraleyda Gobolka Baay, C/nuur Ibraahim Maxamed, ayaa ka warbixiyey xaalada adag ee ay wajahayaan beeraleyda gobolka xilligan. Wuxuu xusay in abaaraha soo noqnoqday ay si weyn u saameeyeen wax-soosaarka beeraha, taasoo keentay hoos u dhac ku yimid nolosha beeraleyda.  Gadoomiye  C/nuur Ibraahim Maxamed wuxuu carrabka ku adkeeyay in beeraleyda gobolka ay la tacaalayaan dhibaatooyin kale sida amni-darro ka jirta deegaanada qaar, taasoo caqabad ku noqotay in si nabad ah loo beero loona goosto dalagyada. Wuxuu ugu baaqay dowladda iyo hay’adaha samafalka inay gargaar degdeg ah la gaaraan beeraleyda si loo badbaadiyo noloshooda loogana hortago macluul soo food saarta bulshada ku tiirsan wax-soosaarka beeraha.

Xaaladda beeraleyda ee Gobolka Baay ayaa u baahan dadaal wadajir ah oo ay sameeyaan dowladda, hay’adaha caalamiga ah iyo bulshada si wax looga qabto dhibaatooyinka is-biirsaday ee saameeyay wax-soosaarka iyo nolosha beeraleyda.

Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa kulan muhiim ah la yeeshay Madaxweynaha Jamhuuriyadda Jabuuti Mudane Ismaaciil Cumar Geelle, iyagoo ka wada hadlay xoojinta xiriirka walaaltinimo iyo iskaashiga istiraatiijiga ah ee ka dhexeeya labada dal.

Labada Madaxweyne ayaa si qoto dheer uga wada hadlay sidii loo sii amba-qaadi lahaa iskaashiga dhow ee dhinacyada amniga, dhaqaalaha, ganacsiga iyo siyaasadda, iyadoo labada Madaxweyne ay bogaadiyeen walaalnimada iyo iskaashiga Labada dal, kaas oo ku salaysan danaha guud ee shacabka Soomaaliyeed iyo kuwa ree Jabuuti.

Madaxweyne Xasan Sheekh ayaa uga mahadceliyey dowladda iyo shacabka Jamhuuriyadda Jabuuti doorka firfircoon ee ay ka qaadanayaan nabadeynta, horumarinta iyo taageerada joogtada ah ee Soomaaliya, waxa uuna si gaar ah uga mahadceliyey doorkooda dagaalka ka dhanka ah Khawaarijta.

Dhankiisa, Madaxweyne Ismaaciil Cumar Geelle ayaa xusay in Jabuuti ay marwalba garabtaagan tahay walaalahooda Soomaaliyeed, isla markaana ay sii xoojin doonaan taageerada ay siiyaan Soomaaliya, gaar ahaan dhanka la dagaallanka argagixisada, dib-u-dhiska hay’adaha dowladda iyo tayeynta hay’adaha ammaanka.

Madaxweynaha Soomaaliya Xasan Sheekh Maxamuud oo tixraacaya soo jeedinta Wasiirka Wasaaradda Gaashaandhigga Soomaaliya ayaa Taliyaha Ciidanka Badda u Magaacabay S/Guuto Cabdiwahaab Cabdullaahi Cumar.

Madaxweynaha ayaa wareegtada ku sheegay dadaalka ay dowladdu ku bixinayso tayeynta Ciidanka Badda Soomaaliyeed, si ay ula wareegaaan amniga iyo difaaca xuduudaha badeed ee dalkeenna, taas oo muhiim u ah qarannimada iyo midnimada.

Madaxweyne Xasan Sheekh ayaa ku ammaanay Taliyihii hore ee Ciidanka Badda Admiral Cabdi Warsame shaqadii uu kasoo qabtay ciidanka Badda intii uu xilka hayay, waxa uuna kula dardaarmay Taliyaha cusub in uu sii labo laabo waajibaadka qaran ee loo idmay.

Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa gaaray magaalada Jabuuti ee caasimadda dalka aan walaalaha nahay ee Jamhuuriyadda Jabuuti, halkaasi oo uu kula kulmi doono dhiggiisa Mudane Madaxwayne Ismaaciil Cumar Geelle.

Labada Madaxweyne ayaa kulankooda kaga wada-hadli doona xoojinta xiriirka soojireenka ah iyo iskaashiga istaraatiijiga ee ka dhexeeya labada dal, gaar ahaan dhinacyada amniga, dhaqaalaha, siyaasadda iyo adkaynta xasilloonida gobolka.

Mareykanka si uusan horey u sameyn taariikhda oo dhan , wuxuu ku daabulayaa Bariga Dhexe , hantidiisa dagaal oo dhan , xilli markii u horreysay 6 diyaaradood oo nooca B-2 ah ee wax burburiya la geeyay saldhig ku yaalla jasiiradda Badweyntaa Hindiya ee Diego Garcia oo ah dhul uu maamullo Ingiriiska oo tan iyo sannadkii 1970 ay u adeegsanayeen Mareykanka iyo Ingiriiska saldhig milatari oo wada-jir ah. Saldhigga wuxuu awood u leeyahay in laga qaado weerarro istaraatiji ah oo lagu beegsanaysan karo dal kasta oo ku yaalla bariga dhexe , iyadoo aan loo baahan adeegsiga hawada dal kale , wuxuuna ku tuusan yahay Iran.

Wargeyska Mareykanka ka soo baxa ee Wall Street Journal, wuxuu ku warramay saldhigyada Mareykanka ee Yurub iyo Bariga Dhexe in laga dareemayo dhaqdhaqaaqyo maalmihii la soo dhaafay, kuwaasoo barbar socday digniino ay is dhaafsadeen Tehran iyo Washington. Warbixintu waxaa kaloo lagu sheegay tobannaan diyaaradood oo kuwa hawada ku siiya diyaaradaha dagaalka shidaalka ee KC-135 oo ay weheliyaan diyaaradaha xamuulka qaada ee Boeing C-17 iyo diyaaradaha howlgallada sahanka iyo basaaska ee Boeing P-8 Poseidon, in ka badan 8 diyaradood ee nooca xambaara bambooyinka culus ee B-52H inay qeyb ka yihiin hantida dagaal ee Mareykanka uu geeyay Bariga Dhexe.

Sawirro dayax-gacmeedka uu qaaday ayaa sidoo kale lagu arkay markabka burburiyaha Mareykanka ee USS Carl Vinson (CVN-70) iyo dhowr maraakiib kale ee Carrier Strike Group One (CSG-1) , iyagoo ka sii gudbaya dhanka galbeed ee badda Sulu ee Filibiin, una sii socda Bariga Dhexe, xilli gobolka ay ku sugnaayeen maraakiibta kale ee Mareykanka

Warbixinta Wall Street Journal, waxaa kaloo lagu daahqaaday in nidaamka difaaca Mareykanka ee Patriot loo geeyay saldhigtada milatariga ee Mareykanka ku leeyahay Bariga Dhexe iyo xulafadiisa.

Taliyaha taliska dhexe ee ciidanka Mareykanka (CENTCOM) , Jen. Michael E. Kurilla ayaa isaguna tagay saacadihii dambe ee shalay Telaabiib, halkaa oo uu kula kulmay saraakiisha Israa’iil, oo la sheegay inuu warbixin ka siiyay dhaqdhaqaaqa uu Mareykanka ka wado Bariga Dhexe.

Muxuu la xiriira dhaqdhaqaaqan?

Warbaahinta Mareykanka iyo Bariga Dhexe , waxay ku warramayaan inay jirto surtagalnimada duullaan uu Mareykanka ku qaadayo Iran , waxayna sheegeen dhaqdhaqaaqa inuu muujinayo wax ka badan cadaadis , arrinta aan waxbadan laga ogeyn waa waxa ku qoran warqadda ay Iran u dirtay toddobaadkii hore Mareykanka ee looga jawaabay warqadii hore ee Trump.

Iyadoo ay jirto walaaca laga qabo duullaan uu Mareykanka ku qaadi karo Iran , ayaa telefishinka Israa’iil ee Channel 14 oo lagu sheego inuu maalgeliyo Netanyahu , waxaa xalay laga sii daayay warbixin lagu sheegay ; “Weerar ballaaran oo lagu qaadayo Iran, oo aan horay loo arag tan iyo dagaalkii labaad ee adduunka, ayaa dhawaan billaan doona.”

Warbaahinta Israa’iil, ayaa sidoo kale ku warramayaa inay jirto kala aragti duwanaasho ka dhex jirta waddamada Bariga Dhexe oo la xiriirta duullaan lagu qaado Iran, si loo burburiyo barnaamijkeeda nukliyeerka iyo gantaallada , halka ugu badan ee kala duwanaasha aragtiyadeed ay ka jirto waa waddamada khaliijka, si cad Sacuudiga iyo Imaaraadka ayaa usoo bandhigaya cabsida ay ka qabaan weerar kasta oo dhibaato gaarsiiya Iran inay ka aargoosanayso weerarro ay ku soo qaado saldhigyada Mareykanka oo ay suragal tahay inay sidoo kale khasaare gaarto kaabayaasha kale ee dhaqaalaha.

Sarkaal ka tirsan dawladda Iran ayaa dhankiisa u sheegay wargeyska Wall Street Journal; “Waxaan beegsan doonnaa saldhigyada Mareykanka ee gobolka, askari kasta oo Mareykan ahna wuxuu noo noqonayaa bartilmaameed.”

Iran waxay heysataa gantaallo xambaari kara madaxyo wax burburiya iyo diyaaradaha aan duuliyahan lahayn oo beegsan kara saldhig kasta oo Mareykanka ku leeyahay Bariga Dhexe , nooc kasta oo duullaan iyo weerarro aargoosi ah oo Mareykanka iyo Iran ku dhex mara bariga dhexe , waxaa lagu sheegay saameyntooda inay gaari karto meel kasta oo ka tirsan caalamka , sabab la xiriira dagaalka waxaa ka dhalanaya in la xiro marinnada ugu muhiimsan ganacsiga oo uu ku jiro marinka Faaris. Gantaallada ku hoobanaya dalalka khaliijka ayaa sidoo kale dunidda gelinaya burbur dhaqaale oo lagu khiyaasayo midkii ugu sarreeyay tan iyo dagaalkii labaad ee adduunka.

Saraakiisha Iran ayaa dhankooda sheegay inay ku jiraan heegan sare , la-taliyayaasha sare ee hoggaamiyaha Iran oo uu ku jiro Cali Larijani, ayaa la sheegay inay kullamo joogto ah la qaadanayaan Khamenei, oo ay u sheegeen sida ay lagama maarmaan u tahay inay Iran ku dhaqaaqdo tijaabada bambada nukliyeerka, iyadoo wakaaladda wararka Iran ee Fars News ay sheegtay inuu si toos ah Cali Larijani ugu sheegay Khamenei, in Trump si ka duwan Iran ula macaamilayo Waqooyi Kuuriya, taasina ay la xiriirto heysashada nukliyeerka , si loo gaaro dheelitirna looga baahanyahay Iran inay bannaanka usoo saarto bambada nukliyeerka.

Waraysi uu Axaddii siiyay Larijani, telefishinka Iran ee IRINN TV, ayuu sidoo kale wuxuu ku sheegay ; “ Haddii Mareykanka ama Israa’iil ay sameeyaan khaladka duqeymaha Iran, waxay nagu qasbi doontaa inaan u gudubno jihada dhismaha hubka nukliyeerka.”

Duullaan ka dhan ah Iran , wuxuu leeyahay saameyn ka baxsan Bariga Dhexe;

Wakaaladda wararka Ruushka ee TASS, ayaa baahisay hadal ay ka soo xigatay fallanqeeye Ruushka ah oo u sheegay duullaan kasta oo lagu qaado Iran , inuu isku beddeli karo dagaal daba-dheeraada oo gaaraya meelo ka baxsan Bariga Dhexe , wuxuu markaa tilmaamay duullaankaa inuu soo dedejin karo Shiinaha inuu qaado weerar ka dhan ah Taiwan, halka Ruushkana uu ku sii soconayo dagaalka Ukraine , isagoo arkaya in iska horimaad kasta oo Mareykanka uu ku lug leeyahay ay ku biiri karaan dalalka Yurub, taa oo dib usoo celinaysa iskaashigooda. Duullaanka ka dhanka ah Iran, waxaa kaloo fallanqeeyahan uu ku sheegay inuu horseedayo burburkii dhaqaale ee ugu sarreeyay oo caalamka uu wajahayo , mana la helayo hab lagu kala adkaado, maaddama mar kasta oo Iran ay arkayso burbur weyn oo gaaraya ay ballaarin karto dagaalka , iyadoo beegsanaysa kaabayaasha dhaqaalaha dalalka bariga dhexe ee xiriirka la leh Mareykanka.

Ciidamada ammaanka ee Maamulka Puntland ayaa qorsheynaya weeraro duqeymo ah oo culus oo lagu beegsanayo dagaalyahanada Daacish ee ku sugan ceelka Miraale, sida ay xaqiijiyeen saraakiil ka tirsan Puntland.

Wararka la helayo ayaa sheegaya in dagaalyahano ka tirsan Daacish ay ku go’doonsan yihiin ceelka Miraale, halkaas oo ay ciidamadu qorsheynayaan inay si buuxda ula wareegaan. Sida ay sheegeen saraakiishu, saacadaha soo socda ayaa lagu wadaa in uu bilowdo howlgal xooggan oo dhinaca dhulka ah, kaas oo ciidamadu ay kaga siqayaan jihooyin kala duwan.

Cutubyo ka tirsan ciidamada difaaca Puntland, kuwaas oo si buuxda u qalabaysan, ayaa saaka dhaq-dhaqaaqyo ciidan oo ballaaran ka bilaabay nawaaxiga ceelka Miraale. Ilo-wareedyo lagu kalsoon yahay ayaa sheegaya in duqeymo culus la filayo in ay goordhow bilaabaan, si loo burburiyo fariisimaha kooxda Daacish.

Dhinaca kale, war rasmi ah oo kasoo baxay Maamulka Puntland ayaa si kooban u xaqiijiyay in duqeymihii shalay ay diyaarado Mareykanku ka fuliyeen togga Miraale iyo nawaaxigiisa lagu laayay dagaalyahano firxad ah oo ka tirsan Daacish. Bayaanka, oo lagu qoray luqadda Ingiriiska, ayaa xusay in weerarkaasi uu si gaar ah u beegsaday xubno sare oo ka tirsanaa kooxda.

Buuraha Calmiskaad, oo ah saldhigga ugu weyn ee dagaalka lagula jiro Daacish, ayaa wali ah goob dagaal oo ay ciidamada Puntland ka wadaan howlgallo aan kala joogsi lahayn. Sida la xaqiijiyay, dagaalyahanada Daacish ayaa ku dhuumaalaysanaya godadka hoostooda, taasoo adkeysay in si fudud loola wareego xarumahooda.

Saraakiisha ammaanka ayaa sheegaya in howlgallada socda ay yihiin kuwo lagu ciribtirayo Daacish, islamarkaana ay sii socon doonaan ilaa laga gaarayo natiijo rasmi ah. Puntland ayaan weli shaacin tirada rasmiga ah ee khasaarihii ka dhashay duqeymihii hore, hase yeeshee wararka madax bannaan ayaa tilmaamaya in dagaalku weli socdo.

Wixii warar ah ee kusoo kordha howlgalka, wararkeena xiga ayaan idinku soo gudbin doonnaa.

Waxaa lagu wadaa in wafdi ballaaran oo uu hoggaaminayo Ra’iisul Wasaaraha Xukuumadda Federaalka Soomaaliya, Mudane Xamse Cabdi Barre, ay goordhow ka ambabaxaan magaalada Muqdisho, iyagoo ku wajahan magaalada Laascaanood, oo ah xarunta maamulka KMG ah ee SSC-Khaatumo.

Qaban-qaabadii ugu dambeysay ee safarka ayaa si xowli ah uga socota gudaha garoonka diyaaradaha ee Aadan Cadde, halkaas oo ay wafdiga ka qaadi doonto diyaarad khaas ah. Safarka Ra’iisul Wasaaraha ayaa ah mid muhiimad gaar ah leh, maadaama uu salka ku hayo xoojinta xiriirka dowladda dhexe iyo maamulka SSC-Khaatumo, si loo xoojiyo wadashaqeynta labada dhinac.

Wararka hordhaca ah ee la helayo ayaa sheegaya in Ra’iisul Wasaare Xamse Cabdi Barre uu inta uu ku sugan yahay Laascaanood la kulmi doono madaxda sare ee SSC-Khaatumo, masuuliyiinta heer gobol iyo heer degmo, saraakiisha amniga, odayaasha dhaqanka, iyo qaybaha kala duwan ee bulshada. Kulamadan ayaa la filayaa in diiradda lagu saaro arrimaha amniga, dib-u-dhiska, horumarka deegaanka, iyo sidii loo dardargelin lahaa adeegyada aasaasiga ah ee bulshada.

Sidoo kale, Ra’iisul Wasaaraha ayaa qorsheynaya inuu booqdo magaalooyin kale oo ka tirsan gobolka Sool, si uu ugu kuurgalo xaaladaha nololeed ee shacabka iyo baahiyaha taagan. Waxaa la filayaa in intii uu socdaalkiisa ku guda jiro uu dhagax-dhigo mashaariic horumarineed oo dowladdu waddo, kuwaas oo qeyb ka ah dadaallada lagu xoojinayo dib-u-dhiska kaabayaasha dhaqaale iyo adeegyada bulshada ee deegaanka.

Dhinaca kale, magaalada Laascaanood ayaa haatan laga dareemayaa diyaar garow xooggan oo lagu soo dhaweynayo Ra’iisul Wasaaraha iyo wafdigiisa. Madaxda maamulka SSC-Khaatumo, siyaasiyiin, waxgarad, iyo dadweyne fara badan ayaa isugu soo baxay waddooyinka waaweyn ee magaalada, iyagoo muujinaya sida ay ugu faraxsan yihiin booqashada hoggaanka sare ee dowladda federaalka.

Safarkan ayaa loo arkaa mid taariikhi ah oo lagu xoojinayo wada shaqeynta dowladda federaalka iyo maamulka SSC-Khaatumo, waxana la filayaa in uu horseedo horumar muuqda oo ka hanaqaada gobolka. Wararka la xiriira safarkan iyo kulamada uu Ra’iisul Wasaaraha la qaadan doono mas’uuliyiinta deegaanka ayaa la filayaa in ay saacadaha soo socda soo baxaan.

Cabdirashiid Maxamed Xaashi (Duqa) oo ah afhayeenka madaxweynihii hore ee dalka Mudane Maxamed Cabdullaahi Maxamed Farmaajo ayaa ka hadlay arrimo xasaasi ah oo ku aadan xaaladda dalka, gaar ahaan gogosha uu fidiyay madaxweyne Xasan Sheekh Maxamuud, arrimaha doorashooyinka iyo dastuurka dalka.

Cabdirashiid Duqa oo wareysi siiyay Shabelle Tv ayaa marka hore soo dhaweeyay shirka wadatashiga ah ee uu ku baaqay madaxweynaha Soomaaliya, waxaase uu tilmaamay in madaxtooyada looga fadhiyo inay caddeyso goorta la qabanayo, cidda ka qayb-galeyso iyo ajendaha guud ee shirka wadatashiga ah.

Sidoo kale, wuxuu tilmaamay in weli aanu caasuumaad ramis ah soo gaarin dhankooda, ayna jawaab ka sugayaan kooxda Villa Soomaaliya.

Dhanka kale, wxuuu ka hadlay xiisadda dhex oogan dowladda federaalka iyo qaar kamid ah maamul goboleedyada, isagoo ku taliyay in madaxweynuhu doono madaxda maqan.

“Haddii ay taagan tahay car iyo wir oo madaxweynayaasha maamul goboleedyada qaarkood loo jaray waaran soo qabasho ah marka ay halkaas taagan tahay runta la’isku sheegayaa, shirkan waxaa muhiimaddiisu ay tahay in talo wadaag la yeesho, waxaana la rabaa in madaxweynaha uu doono madaxda maqan” ayuu mar kale yiri Cabdirashiid.

Waxaa kale oo uu soo hadal qaaday arrinta doorashooyinka iyo wax ka beddalka dastuurka oo uo u tilmaamay in hal dhinac laga raray, sida uu hadala u dhigay.

“Qaabka doorashooyinka loo galayo, guddiga ka shaqeynaya iyo dastuurka waxaas oo dhan waxaad moodaa inuu yahay Process uu keligiis isku koobay madaxweynuhu, dowladihii xubnaha ka ahaa DFS qayb kama ah, waxayna ahayd in shaqada la’isla wado” ayuukusii daray.

Farmaajo oo horay bayaan usoo saaray ayaa soo dhaweeyay baaqa madaxweyne Xasan Sheekh Maxamuud, isagoo ku tilmaamay “tallaabo loo baahan yahay oo qeyb ka noqon karta xal u helidda duruufaha siyaasadeed iyo khataraha amni ee dalka.”

“Baaqa ku saabsan qabsoomidda shir wadatashi qaran ah ee uu soo jeediyey Madaxweyne Xasan Sheekh Maxamuud waa tallaabo loo baahan yahay oo qeyb ka noqon karta xal u helidda duruufaha siyaasadeed iyo khataraha amni ee ku gadaaman dalkeenna.” ayuu yiri Maxamed Cabdullahi Maxamed (Farmaajo).

Taliyaha ciidanka Boolis Milataaro Gaashaanle Aadan Jeelle oo la hadlay warbaahinta ayaa ka warbixiyay howlgalladii ugu dambeeyay ee ay ka sameeyeen magaalada Muqdisho iyo duleedkeeda, kuwaas oo ay uga dhinten askar iyo saraakiil ka tirsanaa ciidanka xasilinta ee loo xilsaaray amniga guud ee caasimada.

Aadan Jeelle ayaa xaqiijiyey in intii ay ku guda jireen howlgalladii lagu sugay amniga bishii Ramaadaan ay ku waayeen askar iyo saraakiil ka tirsanaa Boolis Milataaro, kuwaas oo uu tilmaamay inay ku shahiideen howlgallo ay fuliyeen.

Taliyuhu ma shaacin tirada askarta iyo saraakiisha ka dhintay oo uu Alle uga baryay inuu u naxariisto, kana waraabiyo Jannadii Fardowso.

“Bishii Ramadaan gudaheeda intii aan ku guda jirnay ciidana way naga shahiideen, saraakiilna way naga shahiideen, iyada oo weliba ay tahay bil Ramadaan ay Sooman yihiin, waxa ay u dagaalamayeena waxa ay ahayd badqabka shacabka” ayuu yiri.

Sidoo kale wuxuu raaciyay “Aan u duceyno, iyaga oo Sooman ayay shahiideen, Ilaahey ha u naxariisto, Jannadii Fardowso Alle haka waraabiyo”.

Dhanka kale, waxa uu hoosta ka xariiqay in guul wayn ay ka gaareen howlgallada ay sameeyeen, isla markaana ay si nabad ah ku soomeen dadka Soomaaliyeed, kuna fureen, maadaama haatan loo dabaal-degayo munaasabadda Ciidul-Fitriga.

“30-kii cisho ee lasoo dhaafay qof naga mid ah oo hurday ma jiro, saacad kasta ayaan soo jeednay, xilli kasta ayaan u diyaarsaneen waajibaadka iyo xaalad kasta oo soo kororta, runtii waana ku guuleysanay maanta dadka Soomaaliyeed si nabad ah ayay ku Soomeen,Ilaahey ayaa mahadaa iska leh” ayuu mar kale yiri Taliye Aadan Jeelle.

Waxaa kale oo uu farriin culus u diray reer Muqdisho, isaga oo ka dalbaday inay kala shaqeeyaan amniga guud, si looga hortago wax kasta oo halis ku ah nabad-geylada.

Muqdisho ayaa haatan ka nasatay weeraradii qaraxyada ahaa iyo dilalkii ay ka gaysan jirtay kooxda Al-Shabaab, waxaana ay ku timid qorshaha ay la timid dowladda dhexe.

Howlgallo is daba joog ah ayaa inta badan ciidamada Booliska Soomaaliya, kuwa Xasilinta iyo Nabad-sugidda ay ka sameeyeen caasimada iyo nawaaxigeeda.

Xiisad dagaal oo u dhaxaysa Ciidamada dowladda iyo Al-Shabaab ayaa ka taagan tan iyo shalay deegaanka Sabiid oo ku dhaw degmada Afgooye ee gobolka Shabeellaha Hoose.

 Dadka deegaanka ayaa ku jira xaalad cabsi ah, iyadoo qaarkood ay u carareen degmada Afgooye si ay uga badbaadaan dagaal suurta-gal ah inuu labada dhinac ku dhexmaro Sabiid oo hadda gacanta ugu jira Al-Shabaab, oo todobaad hore la wareegtay.

Dagaal xoogan ayaa ka dhacay deegaanka dhowr jeer, waxaana isaga baxay Ciidamada dowladda Soomaaliya kadib markii culeys badan lasoo saarey, oo la kulmeen weeraro joogta ah oo Al-Shabaab kusoo qaadey.

Sidoo kale waxaa laga barakacay degmada Awdheegle, oo ku dhaw Sabiid, iyadoo halkaasina ay ka jirta xiisad colaadeed, taasoo timid kadib markii Ciidamada dowladda isku dayeen inay dib u lawareegaan maamulka oo gacanta ugu jira Al-Shabaab.

Al-Shabaab ayaa bishii Ramadan kordhisay weerarada gobollada Shabeellaha Hoose iyo Shabeellaha Dhexe, iyadoo kooxda u suurtagashay inay dib ula wareegtay dhowr deegaanka, taasoo ka dhigay dharbaaxo ku ku dhacday awooda dowladda Soomaaliya.