Baydhabo-{WMN}- Xoogag hubeysan oo katirsan Ururka Al-Shabaab ayaa weerar ku bilaawday madaafiic waxaa ay ku qaadeen Saldhiga Ciidamada dowladda iyo kuwa howlgalka Midowga Afrika ee ATMIS kuleeyihiin degmada Waajid ee Gobolka Bakool.
Mas’uuliyiin katirsan Maamulka degmada Waajid ayaa sheegay in Saldhiga la soo weeraray ay degan yihiin Ciidamada xoogga dalka gaar ahaan ururka 260aad, isla markaana halkaasi uu ka dhacay dagaal leysku adeegsaday hubka noocyadiisa kala duwan.
Ciidanka Ururka 260aad Guutada 9aad ee qeybta 60aad iyo Kuwa ATMIS ayaa Madaafiic kala duwan u adeegsaday Xubnihii soo weeraray, waxaana saraakiisha Ciidamada ay sheegeen inay madaafiicdaas dhimasho & dhaawac ku noqday Xubno katirsan Al-Shabaab.
Wararkii ugu dambeeyay ee naga soo gaaraya degmada Waajid ee Gobolka Bakool ayaa sheegaya in xaaladda Maanta ay tahay mid degan, hayeeshee Ciidamada dowladda ay duleedka degmadaas ka wadaan howlgallo kala duwan.