{WARSANRADIO}Hoggaamiyeyaashii Al-Shabaab ee Gobolada Baay iyo Gedo ayaa la sheegay inay isku soo dhiibeen ciidamada dowladda Soomaaliya, iyagoo ku dhawaaqay inay isaga baxeen Al-Shabaab, wixii hadda ka dambeeya la dagaalami doonaan.
Guddoomiyeyaasha Shabaabka u qaabilsanaa Baay iyo Gedo oo lagu kala magacaabo Macalin Geeddow Aadan Abuubakar iyo Sheekh C/raxmaan Fiilow ayaa sheegay in muddo ay soo socotay inay isaga soo baxaan Shabaab.
Macalin Geeddow oo wareysi siiyay Idaacada Radio Muqdisho ee codka Ciidamada ayaa sheegay in isaga iyo C/raxmaan Fiilow ay ka soo baxeen Shabaab, kaddib markii ay bedeleen fikirkii ay ku balansanaayeen, isla markaana ay la soo baxeen dano kale oo lagu burburinayo dalka.
Waxaa uu sheegay inay wehliyaan tiro ciidamo ah, waxaana uu tilmaamay in howshan ay soo socotay muddo sideed bilood, isaga iyo Guddoomiyaha Gedo ay hoos iskala socdeen, haatana ay ka faa’ideysteen cafiska Madaxweyne Farmaajo.
Dowladda Soomaaliya ayaa soo dhoweysay tallaabada ay isku soo dhiibeen raggan, waxaana ay sheegtay inay qeyb ka aheyd cafiska Madaxweynaha u fidiyay xubnaha Shabaabka ka soo goosta.
Dhowr jeer oo hore Hoggaamiyeyaal iyo Saraakiil sar sare oo ka tirsan Shabaab ayaa ka soo goostay, kuna biiray dowladda Soomaaliya.