{WARSANRADIO}Xukuumadda Soomaaliya ayaa ugu hambalyeysay Xoghayaha Guud ee Ururka Jaamacadda Carabta sanad-guurada 73aad ee aas aaska Ururkaas oo ku beegneyd 22-kii bishan.
Ururka Jaamacadda Carabta ayaa la aas aasay sanadkii 1945, waxaana Soomaaliya ay xubin firfircoon ka tahay Ururka, kuna biirtay sanadkii 14 February 1974-tii.
War saxaafadeed ka soo baxay Wasaaradda Arrimaha Dibadda Soomaaliya ayaa lagu sheegay inay boggaadineyso Jaamacadda Carabta garabjoogga milgaha leh ee ay u muujisay shacabka Soomaaliyeed iyo xukuumaddiisa intii ay jirtay masiibooyinka dabiiciga, dhibaatooyinka iyo falalka xun ee argagaxisadu geystaan.
War saxaafadeedka oo ku qornaa afka Carabiga ayaa loogu baaqay dhamaan dowladaha xubnaha ka ah Ururka Jaamacadda Carabta inay safaaradahooda iyo ergadooda diblomaasiyadeed Caasimadda Muqdisho, si loo taageero dadaallada joogtada ah ee lagu sugayo ammaanka iyo deganaanshaha, si wadajir ahna looga shaqeynayo ka hortagidda caqabadaha iyo culeysyada si loogu guuleysto waajibaadka, qorshayaasha iyo mashaariicda hiigsiga leh.
Soomaaliya loo eegaa inay muhiim ugu fadhido Jaamacadda Carabta marka loo eego ilinka istiraatiijiyadda ammaan ee dunida carbeed sababo ku aaddan bedka Juquraafi ee ay ku fadhido iyo lahaanshaheeda xeebta ugu dheer Afrika
