{WARSANRADIO}Maxkamadda Darajada koowaad ee Ciidamada qalabka sida ayaa bilowday dhageysiga dacwad loo heysto nin lagu soo eedeeyay inuu Kooxda Daacish u duubi jiray muuqaalada dilalka, kaasoo bishii April ee sanadkan laga soo qabtay duleedka degmada Afgooye ee Gobolka Shabeellaha Hoose.
Ninkan oo lagu magacaabo Jaamac Xuseen Xasan ayaa ka kala tirsanaa Al-Shabaab iyo Daacish, waxaana laga soo qabtay meel uu miino ku aasayay oo lagu magacaabo Bood-Boodka oo ku dhow degmada Afgooye.
Xafiiska Xeer Ilaalinta maxkamadda ciidamada qalabka sida ayaa ninkan ku soo oogay dambiyo kala duwan, waxaana Maxkamadda la horkeenay Kaamirooyin iyo agab kale oo laga soo helay gurigiisa, markii ciidamada ammaanka gacanta ku dhigeen.
Waxaa Maxkamadda lagu soo bandhigay caddeymo ay ka mid yihiin qiraalka eedeysanaha, marqaatiyaal ay ka mid yihiin Ciidamada Amniga ee degmada Afgooye ka soo qabtay, muuqaalo laga helay gurigiisa oo ay ku jireen dad la dilay, fiillooyin iyo batariyaal
Sidoo kale ninkan ayaa lagu soo eedeeyay inuu dil ka geystay magaalada Boosaaso iyo dagaalo uu ka qeyb galay oo ka dhacay Gobolka Bari ee Puntland.
Dhageysiga iyo dacwada kaddib ayaa Xeer Ilaaliyeyaasha waxay soo jeediyeen in ninkan lagu fuliyo xukunnada qodobada ay ku soo eedeeyeen, waxaana ay sheegeen in nuuca duubista dilalka ay geysato Daacish uu yahay mashruuc aan diin aheyn.
Guddoomiyaha Maxkamdda darajada 1aad ee ciidamada qalaabka sida G/sare Xasan Cali Nuur Shuute ayaa soo xiray fadhiga maxkmadda, waxaana u sheegay dhammaan ka qeyb galayaasha in go’aanka ay dib ka soo saari doonaan.
