{WARSANRADIO}Wasiirka Waxbarashada Soomaaliya C/raxmaan Dahir Cusmaan ayaa sheegay in aanay aqoonsaneyn jaamacadaha ku yaalla dalka.
Wasiirka ayaa sheegay in Jaamacadaha ay kaliya siiyeen aqoonsi ay ku shaqeeyeen, balse aanu jirin aqoonsi rasmi ah oo jaamacad ahaan ay u aqoonsan yihiin.
“Anaga ma jirto Jaamacad aan aqoonsanahay oo Jaamacad ahaan u aqoonsanahay ma jirto oo aan dhihi karno Jaamacadani waan aqoonsahay oo tayada waxa ay bixinayso, sababtoo ah koow waan qiyaaseynaa jaamacado badan oo dalka ku yaal inay soo buuxinayaan heerarka caalamiga ah”ayuu yiri Wasiirka Waxbarashada Soomaaliya oo wareysi siiyay Telefishinka Somali Cable.
Sidoo kale Wasiirka ayaa tilmaamay in Wasaaraddiisa aanay xitaa aqoonsaneyn Jaamacadda Umadda Soomaaliyeed oo ah Jaamacad hoos-tagta dowladda Soomaaliya, sanado ka horna dib loo howl geliyay, kaddib burburkii dowladdii Dhexe.
In ka badan 50 Jaamacadood ayaa ku yaalla dalka, gaar ahaan Jaamacadaha ugu badan ayaa ka dhisan magaalada Muqdisho, waxaana sanadihii dambe ay jaamacdaha noqdeen sidii Iskuulada gaarka oo kale.
