{WARSANRADIO}Sibby lingh saaniyi inghneghddy iloow sithii yee kiingh qophaty yaa lunku guthubee, haabby haatoo sinithungh mysehlangh wal iskydheghenghyi illaa salky ya lislyseethy lyfathoohaayi sithy teely inghdareerty hobby fiirithy ii hunug hunughddy arlaathy yaaly oo yeeny mithaanky dowky mug ii mayaangh inghweeloohaayty.
Mathaly Koofur Orsy yaaly langh moog maa langh og mataawiyaaw iny gorothy waaysinghyi waddoothy faalithy hortabky arartiyee kory joornaalky AF-MAAL meely yee inghdhiyaasy dareershee ety.
Afyaal mariithy ya eri. “Deer baty Gu’ waa deeraasee, lankii ALLY alaf inky daroo aameeyi, kankally usiibaa lydaareey dareesitheey dowlaayoow doowaa”.
Haty sithiiyaa mathaly Koofur Orsy yaaly November 17th yee hobby Eebbywiiny ethemy si lytaawiyaaw wal kyharbiyi doony lan waloowby gee taaktaa hamiinghny tabartaa iny kudhiyi doonghty ya lisky rahanghyi sithy sheektaaly gudoonky BKO haayty kedkii lyhiraayi Kolfidhighii 4aad sinithungh 2018ky.
Harby ii tafaanghyi siyaasitheed tii inky kakanaayty ya Koofur Orsy martygiliisshee inis maliyoohaayty si yee ingh qaabily koleeytanghky lankii yee hilshee qaathy lahaayi oo kolkungh faddiyoothiyee eed inghbathanghty oo le’ery kory langh hilshee iny qaathy inghfathaanibby koofur Orsy araathiyeebby myrooghy.
Langhwaloobby hoo dhamisheey kyjarty Koofur Orsy iny dowky inghdhikaalshee naghathy, su’aaly meely taaly ya wali ettaa, Koofur Orsy too laybu waa, hoobby lisly fathy hindhoo luku wathy sheeny, lankoony leyi “Anni yee oo dhunghsighnty lanby danaaghy inku lahaayny helly, dhabsiyeey dhikaalungh ii suurudungh inghweeleey sibby mi’iingh dhaafsinny hungjhuftiingh dhunghjhiyi iilydhiyi hatyleey isbileey dhabangh ii dhoghorbby weeldhateey dhamighiingh ku biya Koofur Orsy maku dheregnee walaa iinky dhimingh”.
Feeylahaathy faddy inny doosheey lydheeghy oo lilly dhiyi, may weely Koofur Orsy inty usy ku sheeghy hoobby linis inkiraany sithy yaa haayty hortiis isly oghniinghny faddiyoothungh inty deerty misiingh lahaayny, iny isly faddaangh langhbby meelii rooghy guthaa ii banaanky koofur Orsy usy inghweely. Illoow ma siingh maaddy iny saas ettaany maddoony mo’oshiithiingh, walaa siingh maathany walibuwaa KO markoo leey hilshee helooy taasoo shalay siinky jarny, langh qaathoony inghbaahanaayty, lankii yee oo saas etty qaathy sithungh lisly fathy ku weeliny kolkungh iilly dhiyi ky ereebiyoohaaytaangh isingh oo iniingh ogaaynee hatany hurmy doroosaangh.
Sibby haaty Koofur Orsy my dhug dorungh yeebbaa hiiliyaasy, sababtiny wali ettaa lambby geethighii abuuri usi meraashee guruthee. My dhur dorongh KO yeebby gorothaasy lankii abaal galathy yee oo saweethy yaaly sibby liniingh deyaany hilooysitheey si ku weeli, mykyaaloow inny langh dhabanghshee lee harahi iny unku hiiliyaasy, shalayny ingh araghaany yee oo dangh dorooysinghtaa langh hilshee qaathy inghbaahanaayty.
Koofur Orsy me’eh “SIYAASY ASHEER GALY” lanky yee jeeyoony me’eh dhabangh ii dhilaal koo kyrahaaw oo danghtiis etty iny suuridiyee leey asheery, dhilaalshee kydhaaysithy, dhabanghshee ky dhiigooysithy, hamisheeyby eyi iny Koofur Orsy kydheefsithoo inghnaghaty siyaasy usy asheersithy dhibsheeny ku asheery sidaasny Koofur Orsy inky haaty “SIYAASY ASHEER GALY”.
W/Q: Qoraa Sare Ustaad Mukhtaar Sheekh Aadan (Dalmar)
