Baydhabo Somaliya{WMN}- Wasiirka wasaaradda waxbarashada hidaha iyo tacliinta sare ee xukuumadda federaalka Soomaaliya Mudane Cabdulahi Goodax Barre ayaa maanta magaalada Muqdisho kulan kula qaatay Madaxa hay’adda USAID u qaabilsan adeegga bulshada, gaar ahaan Waxbarashada iyo Caafimaadka, Mr. Kevin Smith.
Kulankan ayaa waxaa goob joog ka ahaa xoghayaha joogta ee wasaaradda waxbarashada mudane Axmed Xassan Yuusuf, iyo Iimaan Yaroow oo ka socday USAID.
Wasiirka waxbarashada Soomaaliya mudane Cabdulahi Goodax Barre ayaa tilmaamay in madaxa USAID u qaabilsan adeegga bulshada, gaar ahaan waxbarashada iyo caafimaadka ay ka wada hadleen ,xoojinta tageeradda farsamo iyo mida dhaqaale ee USAID ka geysto horumarinta waxbarashada dalka.
“Maanta waxaan magaalada Muqdisho kulan kula qaatay, madaxa hay’adda USAID u qaabilsan adeegga bulshada,arrimaha aan ka wada hadalnay waxaa ka mid ah, sidii ay u xoojin lahayeen taageerada farsamo iyo mida dhaqaale ee ay ka geystan, horumarinta waxbarashada dalka’ayuu yiri mudane Cabdulahi Goodax Barre.
Mudane Cabdulahi Goodax Barre ayaa sharaxaad ka siiyay halka ay mareyso waxbarashada dalka, gaar ahaan manhajka cusub, tababarka macalimiinta,tacliinta sare iyo xiriirka wasaaradda kala dhexeeya wasaaradaha waxbarashada dowlad goboleedyada.
Madaxa USAID u qaabilsan adeegga waxbarashada iyo caafimaadka Mr. Kevin Smith ayaa bogaadiyay dadaalka wasaaradda waxbarashada ay ugu jirto sidii loo horumarin lahaa waxbarashada dalka isagoo ballan qaaday in USAID ay wasaaradda ku garab istaagi doono horumarinta waxbarashada.
“Waxaan bogaadinaya howsha ay qabtay wasaaradda waxbarashada Soomaaliya iyo dadaalka ay ugu jirto sidii loo horumarin lahaa waxbarashada, waxaan ballan qaadaya in aan idinku garab istaagi doono, sidii loo horumarin lahaa waxbarashada dalka’ayuu yiri Kevin Smith.
Wasaaradda waxbarashada dalka ayaa dadaal ugu jirta sidii loo horumarin lahaa waxbarashada dalka iyadoo dhawaan magaalada Muqdisho tababar loogu soo gaba gabeeyay ilaa 100 macalin oo wax ka dhigi doono dugsiyo ku yaala gobolka Banaadir kuwaasoo ay gacanta ku heyso dowladda federaalka Soomaaliya.
