Dawladda boqortooyada Sacuudiga ayaa ku dhawaaqday inay xanibaada ka qaadi doonto inta badan magaalooyinka dalkaas, gaar ahaan magaalooyinka barakeysan ee Maka iyo Madiina, dabayaaqada bisha soo socota ee June.
Wakaaladda wararka Sacuudiga ee SPA ayaa baahisay in amar kasoo baxay Boqor Salmaan Bin Cabdicasiis la faray in bandowga laga qaado magaalooyinka barakeysan ee Maka iyo Madiino oo ay malaayiin Muslimiin ah sanad walba tagaan.
Boqorka ayaa sheegay in dadka loo furi doono masaajidda si ay ugu cibaadeystaan.
Wixii ka dambeeya 31-ka bishan ayuu Boqorku amray in la fasaxo gadiidka gudaha Sacuudiga ka shaqeeya, sidoo kalena 21-ka June waxaa si rasmi ah bandowga looga qaadi doonaa magaalooyinka Maka iyo Madiina.
Warkaan kasoo baxay boqortooyada waxaa lagu sheegay in aan la fasixi doonin Xajka iyo Cumrada sanadkan, sababo la xariira cabsi laga qabo in uu faafo xanuunka dilaaga ah ee Coronavirus.
Sharciyada kala fogaanshaha bulshadda iyo inay mamnuuc tahay in kontomeeyo ruux meel iskugu timaado ayaa sidoodii ahaan doona, sida warkan lagu sheegay.
Qiyaastii 75 kun oo qofood ayaa gudaha Sacuudiga laga helay xanuunka COVID-19, halka 400 oo kalena ay ku geeriyoodeen.
