Ra’iisul Wasaare ku-xigeenka Xukuumada Mahdi Maxamed Guuleed Qadar ayaa maanta si rasmi ah xariga uga jaray fagaaraha midnimada qaranka (ex Baarlamaan) oo laga sameeyay goob dadka Muqdisho iyo dalxiisayaasha ku Nastaan.
Munaasabada xariga looga jarayay fagaarahan nasiinada loogu tala galay ayaa waxaa ka qeyb galay Masuuliyiin kala duwan oo katirsan dowlada federaalka Soomaaliya, saraakiil ciidan iyo dadweyne kala duwan.
Fagaarahan oo loogu magac daray midnimada Qaranka ayaa laga dhisay halka uu ku yaalay xaruntii hore ee Baarlamaanka Soomaaliya ee ku dhaw taalada caanka ah ee Daljirka Dahsoon .
Fagaarahan cusub ee laga dhisay magaalada Muqdisho ayaa ka qeyb qaadanaya dib u dhiska iyo bilic soo celinta caasimada Muqdisho, waxaana goobta fagaarahan laga dhisay mudo sanado badan aheyd goob bur bursan.