Kulankii Khamiis-laha ahaa ee golaha wasiirrada Soomaaliya waxaa lagu magacaabay sideed xubnood oo kamid ah 9-ka xubnood ee maamulka hey’adda Batroolka Soomaaliyeed, sida ay shaacisay xukuumaddu.
Ibraahim Cali Xuseen oo 6-dii sano ee lasoo dhaafay la-taliye sare ka ahaa wasaaradda Batroolka iyo Macdanta Soomaaliya ayaa guddoomiye looga dhigay xubnaha maanta loo magacaabay maamulka hey’adda Batroolka Soomaaliya.
Sideeda xubnood ee maamulka hey’adda Batroolka Soomaaliya ee kuluhu maanta ansixiyey ayaa kala ah:
1 –Ibraahim Cali Xuseen (Guddoomiye)
2 -Caa’isho Cusmaan Axmed (Guddoomiye ku-xigeen)
3 –Ibraahim Axmed Leyte (Xubin)
4 –Cabdulqaadir Aadan Maxamuud (Xubin)
5 –Ibraahim Cabdulqaadir Maxamed, (Xubin)
6 –Axmed Xaaji Cabdi (Xubin)
7 –Cabdixaafid Cali Dirir (Xubin)
8 –Iyo Mahad Maxamed Sheekh Xasan (Xubin).
Hey’adda Batroolka Soomaaliya waa markii ugu horeysay ee dalka laga aas-aasay, waxayna xukuumaddu sheegay in sababta loo aas-aasay ay tahay bilaawga qorshihii looga faa’iideysan lahaa kheyraadka dalka.
Dhanka kale Shirkii Khamiis-laha ahaa ee golaha wasiirrada Soomaaliya ayaa lagu meel mariyey shanta xubnood oo kamid noqonaya golaha adeegga garsoorka dalka, kuwaas oo bannaanka ka imaanaya.
Xubnahan shanta ah ee maanta ay ansixiyeen golaha wasiirrada Soomaaliya ayaa kala ah.
1 – Cabdulqaadir Sheekh Ismaaciil Aw-xaashi,
2 – Cali Maxamuud Xasan (Sheekh Cali Wajiis),
3 – Cabdullaahi Cali Cismaan,
4 – Cabdiraxmaan Maxamed Axmed (Cadaani)
5 – Iyo Ifraax Maxamuud Cumar.
Magacaabista xubnahan ayaa imaaneysa, iyadoo mudooyinkii dambe ay cabasho xoog leh ka imaaneysay shaqaalaha garsoorka dalka, kuwaas oo qaarkood lagu war geliyey in imtixaan laga qaadayo.
Inka badan 20 xubnood oo shaqaalaha garsoorka dalka ka tirsan ayaa maalmo ka hor warbaahinta u sheegay in qiil loo raadinayo sidii shaqada looga ceyrin lahaa, kadib markii iyaga oo mudo soo shaqeynayey lagu war geliyey in shaqada ay hayaan ay imtixaan u gelayaan.
Is qab-qabsi dheer kadib kiiska shaqaalahaas waxaa la wareegay xafiiska xeer ilaalinta dalka, oo sida la sheegay go’aan ka soo gaaraya.
