Waxaa maanta oo Sabti ah loo balansanaa in uu Muqdisho ka furmo shirka wadatashiga ee madaxda dowladda federaalka iyo kuwa dowlad goboleedyada dalka, balse sida muuqata waxaa soo wajahay caqabado.
Horay dhamaan madaxda shirkani uu khuseeyo ayaa isugu timid Muqdisho, balse hadda qaarkood ayaa ka maqan.
Madaxweynayaasha Jubbaland iyo Galmudug, Axmed Madoobe iyo Axmed Qoor Qoor ayaa shalay u kala safray magaalooyinka Kismaayo iyo Nairobi.
Axmed Madoobe ayaa Kismaayo u aaday ka qeyb galka aas maanta loo sameynayo Allaha u naxariistee guddoomiyihii rugta ganacsiga iyo warshadaha Jubbaland marxuum Shaafi oo shalay qarax is-miidaamin ah lagu dilay, xilli uu kasoo baxay salaadii Jimcaha.
Sidoo kale madaxweyne Axmed Qoor Qoor ayaa isna shalay ka duulay garoonka Aadan Cadde ee Muqdisho, isagoo gaaray magaalada Nairobi ee dalka Kenya.
Lama shaacin sababta rasmiga ah ee ka dambeysa in Qoor Qoor uu u safro Nairobi, balse wararkii ugu dambeeyay waxay sheegayaan in isla maanta uu ku soo laaban doono Muqdisho.
Waxaa muuqan saan-saan uu maanta ku furmi karo shirka madaxda dowladda federaalka iyo kuwa dowlad goboleedyada oo markiisii horaba la daalaa-dhacayey shuruudo qabsoomidiisa uga imaanayey madaxda qaar, gaar ahaan Jubbaland iyo Puntland.
Jubbaland ayaa ka qeyb galka shirkaas shuruud uga dhigeysa in ciidamada dowladda federaalka laga soo saaro gobolka Gedo oo gacanteeda ka maqan, taasna weli looma sameyn.
