Saqdii dhexe ee xalay ayaa Magaalada Muqdisho ee Caasimadda dalka Soomaaliya ka da’day Roobab xoogan oo saacado xiriir ah socday, kaasi oo dadka iyo duunyada ay ku diirsadeen, sidoo kalena saameyn geystay.
Inta uusan Roobka bilaaban ayaa waxaa Magaalada Muqdisho iyo deegaanno badan oo ku teedsan laga wada maqlayay Gugaca Roobka, waxaana roobka uu ahaa mid aan u qaboow oo la sugayay.
Maalmihii lasoo dhaafay waxaa Muqdisho laga dareemayay Kuleyl aad u daran , hayeeshee saaka Jawiga Caasimadda waa ah mid qaboow ah, waxaana Wadooyinka qaar dhex fadhiya Biyaha Roobkii xalay ka da’ay Caasimadda.
Qaar kamid ah waddooyinka waaweyn ee degmooyinka Gobolka Banaadir ayaa ah kuwa xiran kadib markii ay biyaha xareedda fadhiisteen, waxaana halkaas maristooda dhib ku qaba gaadiidka Mooto Bajaajta iyo kuwa gaarka loo leeyahay.
Sidoo kale Roobka ayaa saameyn ballaaran ku yeeshay dadka dantayar ee kunool xerooyinka barakacayaasha ah eek u yaalla duleedka Caasimadda, waxaana sidoo kalen biyo farabadan ay Guryaha u galeen Qoysas danyar ah oo degan xaafaddo dhowr oo ka tirsan Gobolka.
Si kastaba deegaano dhowr ah oo ka tirsan Gobolada dalka Soomaaliya ayaa waxaa ka curtay Roobabka Dayrta ah, waxaana ku diirsaday dadka iyo duunyada, iyadoona dadka xoolo dhaqatada ah ay soo sheegayaan inay Barwaaqo la helay.
