Dowladda Mareykanka iyo Midowga Yurub ayaa si wada jir ah u soo dhaweeyey go’aanka Xildhibaannada Golaha Shacabka ee Baarlamaanka Federaalka Soomaaliya ku meel mariyeen in dib loogu laabto heshiiskii 17 September, si dalka uu u galo doorasho.
Bayaan ay soo saaraan Mareykanka iyo Midowga Yurub ayay ku taageereen go’aanka Baarlamaanka.
Sidoo kale waxa ay soo dhaweeyeen go’aanka Madaxweynaha dalka uu hirgelinta iyo Amniga doorashooyinka ugu wareejiyay Ra’iisul Wasaare Maxamed Xuseen Rooble.
Dowladda Boqortooyada Ingiriiska ayaa bayaan ay soo saartay ku sheegtay inay soo dhaweynayaan go’aanka Xildhibaannada Golaha shacabka ay Maanta ku ansixiyeen in dib loogu laabto heshiiskii 17- September
War-saxaafadeed ka soo baxay wasaaradda arrimaha dibadda ee dalka Turkiga dowladda Turkiga ayaa lagu soo dhaweeyey go’aanka ay maanta xildhibaanada golaha shacabka ee baarlamaanka federaalka Soomaaliya ku ogolaadeen in dib loogu noqdo heshiiskii 17-kii September.
“Waxaan soo dhoweyneynaa go’aanka Aqalka Hoose ee Baarlamaanka Soomaaliya uu maanta (1-da Maajo) qaatay, kaas oo ayidsan yihiin in sida ugu dhaqsiyaha badan loo qabto doorashada iyadoo lagu saleynayo heshiiskii 17-kii Sebtember,” ayaa lagu yiri qoraalka Turkiga.
Qoraalka ayaa intaas ku sii daray, “Waxaan rajeyneynaa in horumarkan uu u adeegi doono dib u bilaabida wadahadalada wax ku oolka ah ee daneeyayaasha siyaasada, dib u dhac la’aan iyo in la xaqiijiyo horumarka ku saleysan is afgaradka bulshada, iyadoo laga gudbayo khilaafaadka.”
Ugu dambeyntii dowladda Turkiga ayaa qoraalkan ku shaacisay in marxaladan adag ay ku garab taagantahay dadka saaxiibtinimada iyo walaaltinimada leh ee Soomaaliyeed.
dhanka kale Qoraal ka soo baxay xafiiska Qaramada Midoobey ee Soomaaliya ayaa lagu soo dhaweeyey go’aankii ay maanta xildhibaanada golaha shacabka ay ku ogolaadeen in dib loogu noqdo heshiiskii 17-kii September.
Qaramada Midoobey ayaa sidoo kale madaxda ugu baaqday in dib loo bilaabo wadahadalladii doorashooyinka, iyadoo qoraalka QM lagu soo dhaweeyey doorka doorashada ee ra’iisul wasaare Rooble.
“Qaramada Midoobey waxay soo dhaweyneysaa go’aanka Baarlamanka Federaalka dib ugu soo celiyey heshiiskii doorashada ee 17-kii Sebtember, kadib codsigii madaxweye. Waxaan ugu baaqaynaa hogaamiyaasha Soomaalida inay ku noqdaan wadahadalka oo ay diyaariyaan doorashooyinka, iyadoo aan dib loo dhigin, waxay kaloo QM soo dhaweynaysaa doorka doorashada hogaaminta ee ra’iisul wasaare Maxamed Xuseen Rooble.” Ayaa lagu yiri qoraalka QM.