Wasiirka Gaadiidka ee Uganda General Katumba Wamala ayaa waxaa toogasho ku dhaawacay dabley aan la garanayn meel u dhow gurigiisa oo ku yaal caasimada Kampala.
Gabar uu dhalay iyo Wadihii gaarigiisa ayaa ku geeriyooday weerarkan sida ay xaqiijiyeen ilo deegaanka ah oo Warbaahinta xogtaan la wadaagay.
Sawir laga soo qaaday Gaariga iyo Jananka waxaa ka muuqday dhaawacyo ka dhashay rasaasta lagu furay, waxaana aad u dhiig-baxay Katumba Wamala oo markii dambe gurmad degdeg ah ka helay ciidamo militari ah.
Goob joogayaal ayaa sheegaya in dableydu ay wateen mooto. General Wamala waa taliyihii hore ee ciidanka.
Dhowrkii sano ee la soo dhaafay, dalka waxaa ka dhacay falal noocan oo kale ah oo ay geysteen rag hubeysan oo watay mootooyin.
Bishii Juun 2018, Ibrahim Abiriga, oo ahaa siyaasi caan ah isla markaana aad u taageersanaa madaxweynaha Yoweri Museveni, ayaa lagu toogtay meel u dhow gurigiisa.
Afhayeenkii hore ee booliska Andrew Felix Kaweesi ayaa sidan oo kale loo dilay bishii Abriil 2017.
