Madaxweynaha dowlad Goboleedka Jubbaland Axmed Maxamed Islaam Axmed Madoobe, ayaa maanta daah-furay mashruuca dhismaha wadooyin laami ah oo ka kooban 31km oo qeybtii ugu horaysay oo ka kooban 8-km uu Madaxweynahu maanta dhagax dhigay.
Wadooyinkan ayaa ahaa kuwo mudo soo jiitamayay, isla markana daraasayntooda ay wakhti dheer qaadatay iyadoo laga baaran dagayay sida ugu wanaagsan ee loo heli lahaa shirkad tayo leh oo mashruucan fulisa.
Madaxweynaha Jubaland Axmed Maxamed Islaam, ayaa bulshada ugu baaqay inay ilaashadaan mashariicdan oo ah kuwo wakhti dheer laga soo shaqaynayay oo wax weyn ka tari doona bilicda Magaalada.
Waxaa Madaxweynahu uu xusay in la samayn doono mashaariic kale oo baaxad leh isla markana Maamulka ay ku tala jirto in wakhti dhow lagu hirgaliyo mashariic muhiim ah balse shirkadaha iyo Wasaaradaha Dowlada ee fulinaya looga baahan yahay hufnaan shaqo oo macno leh.
Waxaa munaasabadan Madaxweynaha kala qeybgalay qaar kamid ah golaha wasiirada, maamulka Degmada Kismaayo iyo masuuliyiinta shirkada fulinaysa mashruucan dhismaha Wadooyinka Magaalada Kismaayo.
