Warar lagu kalsoonaan karo oo laga helayo Magaalada Baladweyne ee Xarunta Gobolka Hiiraan ayaa sheegaya in Madaxweynaha dowlad Goboleedka Hirshabeelle Cali Cabdullaahi Xuseen Guudlaawe iyo ku-xigeenkiisa uu soo kala dhex-galay khilaaf xoogan.
Khilaafka soo kala dhex galay Madaxda Hirshabeelle ayaa ku saabsan hannaanka loo marayo doorashada 11 kursi oo ka tirsan kuraasta Golaha Shacabka, kuwaasi oo Madaxweyne Guudlaawe dhowaan fasaxay in la furo, si loogu tartamo.
Ilo ku dhow dhow Madaxweynaha iyo ku-xigeenkiisa Yuusuf Axmed Hagar Daba-geed ayaa xaqiijinaya inuu khilaafka uu durba saameeyay Guddiga doorashada Hirshabeelle oo la kala saftay Madaxweynaha iyo Madaxweyne ku-xigeenka.
Lama oga saameynta ay ku yeelan karto khilaafkan cusub doorashada kuraasta harsan ee Magaalada Beledweyne, iyadoo 8 cisho ay ka harsan tahay mudada 15 maalin ee loo qabtay in lagu soo gaba-gabeeyo doorashada Golaha Shacabka Baarlamaanka 11-aad .
Guddiga doorashada SEIT ee dowlad Goboleedka Hirshabeelle ayaa xalay shaaciyey inuu dib u dhac ku yimid Jadwalkii soo gudbinta Guddigu xulista ergada 11 kursi, sababo jira awgeed, iyagoona xusay inay dib kasoo shaacin doonaan Jadwal cusub oo doorasho.
