Guddiga hirgelinta dowlad Goboleedka Hirshabeelle ayaa Maanta doortay Guddoomiye cusub, kadib markii uu Madaxweynaha Hirshabeelle Cali Cabdullaahi Xuseen Guudlaawe uu xilka qaadis ku sameeyay Guddoomiyihii Guddigaas doorashada Axmed Xasan Diini.
Xubnaha Guddiga doorashada Maamulka oo Maanta kulan ku yeeshay Magaalada Baladweyne ee Xarunta Gobolka Hiiraan ayaa Guddoomiyaha cusub ee Guddigaas u doortay Maxamed Xasan Maxamed Waadi oo uu saakay magacaabay Guudlaawe.
Guddoomiye Waadi ayaa laga sugayaa inuu hoggaamiyo Guddiga doorashada, isla markaana la dhammeystiro doorashada kuraasta Golaha Shacabka Baarlamaanka 11-aad ee ku harsan Hirshabeelle, kuwaasi oo kala yaalla Baladweyne iyo Jowhar.
Madaxweyne Cali Cabdullaahi Xuseen Guudlaawe ayaa xilka qaadis ku sameeyay Guddoomiyihii Guddiga doorashada Hirshabeelle Axmed Xasan Diini, kaasi oo lagu eedeeyay inuu khatar geliyay amniga xubnaha Guddigaas doorashada.
Ra’iisul Wasaaraha Xukuumadda xilgaarsiinta Maxamed Xuseen Rooble ayaa Madaxweyne Cali Guudlaawe ku taageeray tallaabada uu xilkii uga qaaday Axmed Xasan Diini, wuxuuna Ra’iisul Wasaaraha Xukuumadda u hambalyeeyay Maxamed Waadi.
