Guddoomiyaha Guddiga doorashooyinka heer Federaa Muuse Geelle Yuusuf iyo wafdi uu hoggaaminayo ayaa gaaray Magaalada Kismaayo ee Xarunta Gobolka Jubbada Hoose ahna Caasimadda KMG ah ee Maamulka Jubbaland, iyagoo halkaas lagu soo dhaweeyay.
Guddoomiye Muuse Geelle oo ay wehlinayeen xubno ka tirsan Guddiga doorashooyinka ayaa waxaa Garoonka diyaaradaha Kismaayo kusoo dhaweeyay Mas’uuliyiin ka tirsan Maamulka Jubbaland, kadibna waxaa loo gabiyey Xarunta Madaxtyooyada.
Guddoomiyaha Guddiga doorashooyinka Muuse Geelle Yuusuf ayaa kulan la qaadan doona Guddiga doorashooyinka Jubbaland oo ay ka wada hadli doonaan dardar-gelinta qabsoomida doorashada 16-kursi oo lagu qabanayo Magaalada Ceelwaaq ee Gobolka Gedo.
Muuse Geelle ayaa sidoo kale la kulmaya Madaxweyne Axmed Maxamed Islaam Axmed Madoobe, wuxuuna kala arrinsan doonaa doorashada 16-ka kursi ee laga soo wareejiyay deegaan Magaalada Garbahaareey, isagoo Geelle usii gudbaya Ceelwaaq oo doorashada loo wareejiyay.
Sida uu qorshahu ahaa doorashada kuraastan ayaa lagu waday inay qabsoonto maalinta berri oo Isniin ah, balse waxaa suura-gal ah inay dib u dhac, maadaama Guddiga doorashooyinka heer Federaal iyo Mas’uuliyiinta Jubbaland aysan weli tegi Ceelwaaq oo loo wareejiyay doorashada 16-kursi ee caqabada siyaasadeed ka taagan tahay.
Maamulka Gobolka Gedo ee dowladda Federaalka Soomaaliya ayaa kasoo horjeeda in doorashada kuraastaas lagu qabto degmada Ceelwaaq, iyagoona sheegay inay doorasho kale ku qaban doonaan Magaalada Garbahaareey oo ah deegaan doorashada labaad ee Jubbaland.
