Kadib kulan Magaalada Kampala ee dalka Uganda ay ku yeesheen Wasiirada Wasaaradaha Gaashaandhigga Soomaaliya iyo Uganda ayay ku kala saxiixday heshiis is-afgarad ah oo ku saabsan iskaashiga difaaca labada dowladood.
Wasiirka gaashaandhigga Uganda ayaa sheegay in heshiiskaan uu keeni doono is bedelay dhaqaale iyo mid amni oo dhexmara labada dowladood si caqabadaha jira looga gudbo.
“Annaga oo ka duulayna xoojinta xiriirka ka dhexeeya dalalka aan walaalaha nahay, waxaan kala saxiixanay iskaashi dhow oo kobcin doona isbeddelka amni iyo dhaqaale ee bulshadeenna,” ayuu yiri wasiirka.
Wasiirka gaashaandhigga Uganda ayaa sidoo kale sheegay inay ka go’an tahay is-afgaradka la isla meel dhigay in lagusoo bandhigidoono inta lagu guda jiro shirka madaxda labada dal ee loo qorsheeyay 8-11 Ogosto 2022 ee Magaalada Kampala.
Isagoo hadalkiisa sii wata ayaa waxuu ku booriyay labada dhinac in ay meesha ka saaraan danaha dibadda ee la doonayo in lagu kala qeybiyo dalalka walaalaha ah.
Wasiirka Gaashaandhigga Soomaaliya, Cabdulqaadir Maxamed Nuur, ayaa dhankiisa uga mahadceliyey Dowladda Uganda soo dhaweynta isaga iyo wafdigiisa.
Waxaa uu xusay in xiriirka labada dal ee Uganda iyo Soomaaliya uu yahay mid soo jireen ah. Wuxuu sheegay Soomaaliya inay uga baahan tahay Uganda in laga taageero sidii kor loogu qaadi lahaa tayada ciidamada qalabka sida si ay u sii wadaan dagaalka Al-Shabaab.
Heshiiskaan ay Magaalada Kampala ku kala saxiixdeen dowladaha Soomaaliya iyo Uganda ayaa kusoo aadaya xilli Madaxweynaha Soomaaliya Xasan Sheekh Maxamuud uu ku wajahan yahay dalkaasi Uganda.
