Baydhowy-{WMN}-Jamaahiirta kooxda Liverpool ayaa u muuqda kuwo uu ugu dambayn ka dhammaaday samirkii ay u hayeen tababaraha kooxdooda ee Jurgen Klopp.
Liverpool ayaa xaalad aad u xun ku jirta iyadoo laba guuldarro oo xidhiidh ah kala kulantay kooxaha dhibtoonaya ee Nottingham Forest iyo Leeds United oo iyadu xalay Anfield kaga adkaatay.
Da’yarka Crysencio Summerville ayaa daqiiqadii 90-aad 2-1 uga dhigay Leeds United kulankii xalay isagoo tababare Jesse Marsch siiyay saddex dhibcood oo uu u baahnaa.
Reds ayaa haatan hoos uga sii dhaadhacaya kala sarreynta horyaalka iyadoo Leeds oo booska 15-aad ku jirtaa ay kaliya afar dhibcood ka dambayso.
Haddaba, qaar kamida jamaahiirta Liverpool ayaa kaddib kulankii xalay barahooda Twitter-ka ku muujiyay sida loo gaadhay wakhtigii uu Anfield iskaga tagi lahaa tababare Klopp.
Halkan ka akhriso fikradaha qaar kamida taageerayaasha Liverpool ee doonaya in la diro Jurgen Klopp:
“Klopp waa inuu baxo, waan jecelahay isaga shaqsi ahaan waxbadana wuu inoo qabtay balse wakhtigii ayaa la gaadhay”.
“Bye Klopp, waad ku mahadsantahay dhammaan waxa aad noo qabatay balse waa wakhtigii aad bixi lahayd”.
“Aniga way iiga dhammaatay Klopp, Leeds guuldarro kalama kulmi kartid xataa hadaad kooxda 23 sano jirada ka yar kula ciyaaraysid”.
“Klopp waa inuu tago, way iiga dhammaatay”.
