Kusimaha Madaxweynaha DKGS ahna Gudoomiyaha Golaha Wakiilada DKGS mudane Dr. Ali Said Fiqi iyo Wasiirka Wasaaradda Caafimaadka DKGS mudane Said Ahmed Ali ayaa daahfuray talaalada cusub ee Oofwareenka (PCV13) iyo kan shubanka (Rotavirus) oo ka mid noqon doona jadwadka tallaalada dalka.
Munaasabadda waxaa ka soo qeybgalay Agaasimaha Guud ee Wasaaradda Caafimaadka Dr. Ibrahim Adam Ali, Agaasime waaxeedyada iyo howlwadeenada kale ee Wasaaradda Caafimaadka, wakiilo ka socda Hay’adaha WHO iyo UNICEF, bahda caafimaadka iyo marti sharaf kale.
Agaasimaha Guud ee Wasaaradda Caafimaadka DKGS, Dr. Ibrahim Adam Ali oo ka hadlay munaasabadda daahfurka tallaallada cusub ee PCV13 iyo Rotavirus ayaa sheegay in Wasaaradda Caafimaadka ay si joogto ah uga go’an tahay xoojinta barnaamijyada tallaalka, si loo xaqiijiyo caafimaadka guud ee bulshada. Isagoo munaasabada ka sheegay in Wasaaradda Caafimaadka qaban doonto olole ballaaran ee tallaalka isku dhafan ee Jadeecada iyo Oofwareenka kaas oo laga fulin doono dhamaan degmooyinka iyo deegaannada hoos yimaada Dowladda Koonfur Galbeed Soomaaliya.
Wasiirka Wasaaradda Caafimaadka DKGS mudane Said Ahmed Ali oo ka hadlayay munaasabad daahfurka tallaallada cusub ee PCV13 iyo Rotavirus ayaa u mahadceliyay Hay’adaha UNICEF iyo WHO isagoo hoosta xariiqay muhiimadda ay tallaalladani u leeyihiin badbaadinta nolosha carruurta iyo ka hortagga cudurrada dilaaga ah ee sida weyn u saameeya carruurta. Wasiirka ayaa carrabka ku adkeeyey in daahfurkan uu muujinayo dadaalka ay dowladdu ku bixineyso horumarinta adeegyada caafimaadka, gaar ahaan barnaamijka tallaalka qaranka, wuxuuna ugu baaqay waalidiinta iyo bulshada in ay si firfircoon uga qaybqaataan ololaha tallaalka kana faa’ideystaan.
Ugu dambeyn, Kusimaha Madaxweynaha ahna Guddoomiyaha Golaha Wakiilada DKGS mudane Dr. Said Ali Fiqi oo ka hadlay munaasabadda ayaa sheegay in daahfurka tallaallada cusub ee PCV13 iyo Rotavirus uu yahay guul weyn oo u soo hoyatay shacabka Koonfur Galbeed, gaar ahaan carruurta nugul ee u baahan daryeel caafimaad oo joogto ah. Isagoo madasha ka sheegay sida Dowladda Koonfur Galbeed Soomaaliya ay mar walba mudnaan u siineyso horumarinta adeegyada aasaasiga ah, gaar ahaan caafimaadka, isagoo xusay in Golaha Wakiilladu diyaar u yahay inuu taageero siyaasadeed iyo sharciyeed u fidiyo dadaallada Wasaaradda Caafimaadka ee lagu xaqiijinayo in adeegga tallaalku gaaro dhammaan shacabka, meel kasta oo ay joogaan.
Sidoo kale, Kusimaha Madaxweynaha wuxuu ugu baaqay dhammaan hay’adaha samafalka iyo bulshada qeybaheeda kala duwan in ay garab istaagaan dadaallada caafimaad ee socda, si loo xaqiijiyo bulsho caafimaad leh, carruurtana ay u helaan fursad ay si buuxda ugu koraan iyo loogana badbaado cudurada dilaaga ee carruurta saameeya.
