Maraakiibta Dagaalka Turkiga ee lagu magacaabo TCG Gaziantep iyo TCG Yüzbaşı Güngör Durmuş ee ku sugan Xeebaha Dalka ayaa xirtay Calanka Soomaaliya kaddib markii Wasaaradda Dekedaha & Gaadiidka Badda XFS ay soosaartay amarkaas.
Sawirro laga soo qaaday Dhoollatus ay samaynayeen Ciidamada Badda Turkiga waxaa kasoo muuqday Maraakiibtaas oo is dhinac lulanaya Calanka Dalkooda iyo kan Soomaaliya, waxa ay tani ka tarjumaysaa in Ankara ay u hoggaansantay amarkaas.
Turkiga waxaa Biyaha Soomaaliya ka jooga Maraakiib Dagaal iyo kuwa qodaya shidaalka Dalka, waxaa intaas dheer in ay fulinayaan heshiiska Muqdisho & Ankara ee adkaynta amniga Badda oo kol hore ay wadagaleen labada Xukuumad.
Maraakiib kala duwan ayaa horay ugu hoggaansamay xirashada Calanka Soomaaliya marka ay soo galaan biyaha Dalka, Turkiga ayaa ku biiraya Liiska waddamadaas isaga oo ah saaxiib dhinacyo kala duwan ka taageera Soomaaliya.
