Baydhabo{WMN}-Umut kasty wali kyfaanaasee meraayky haldoorshee, lynool taariikdy ii suugaanty arlaathiyoo haalkaas kynoolyiingh, waany fathaayaangh iny rooghaangh intiiby aduunyithy jarty waaqii abuurithy ku qobloothaaw nafty, ambooneey suurky luku afuufuufaaw aduunyithy araathiyee Eebby wiiny ku laabaaw.
Yooby mybathangh, hal ii lamy ya luku helee araathaany dhetiyee, meeraayu, wal liky doorsithaaw ingh lahaayi, ithinghyiingh walk u gediisithaayoo, abtughaaw, lawrqaathoo ku hohoobiyi asal mariithy taariikdii dadkii mariithy hathal wal tar ly ii taariik wali lahaky mary araathungh lamy webi dhetiyoo humaangh ii his lahaayi, halyeeyithii wasingh mariithy ilmiily ii siyaasi, afyaal aramareengh dalkungh ii dadkungh dartiis haangh muthutheengh uny ku hinghdhy saabanghnaa iny lyherny geeky niily gudboonghty.
Ayby tuwangh, weeydiis warsheeyby dhaafy, ay miirly maas lywersithee ba dooghy rooghee. Wal ku qoroow ii lywarqaad xaalsheeyby dhaafe. Reeghaay hordhaangbaa doo inghdhamaayteey, wali erteey. “waa beriyaaw ii waaw quraameed kee bethangh”. Ba yooby erteey. Hatu sidiiyaa, jaree hal ii lamy madi luku reeby, dalkungh uny kynoolny dadsheey asalkii mariithy meel haku askumeengh sithy dhaty e yeethoo silsilaysangh Ab ii isir meely yoo kyaruurayaangh, si yoo inisly dhalatheengh, sithy inghshal deghaayaangh, daaqsity ii qothity sithy yoo inghshal eyiingh araathiny haky degheengh?
Su’aalu iswersishy ingh baahangh, jawaabtiyee anny taawiyaaw iny langh waaheey haldoor guthughaany kyjary koo ii lamy inghmoothaany maa kulighaany inislysheeghy korny, taariik abtughunghny ma taawiyaaw iny langh haayi nii dhajary oo kulughaany taas hegshee matawkaany ku fidhiiny.
Kolkungh isweeydineegh see ky dhiithy. Meel dheer yeethoo lungh ku weeydiny sithy yee kyneghety, dooghungh isly dheegnooy kureed ily niingh boghaasee, dooghiny horaa ingh wathy dooghnee, yeethoo wal bathangh haty goroshoothaany ku moqongh hanii diyaatheengh, wedoothy hathalkeeyny isly gorony meely usu inghbiyi shibithaaw dareersheeyny eyi.
Madii doo inty rooghy, langhky dowuhaayi isly kasny ya taawiyee, bilaawky baany hasiingh sheegheey, halkoo ii lamy muku bathangh ya singh ery, haldooree geeky arathaany ky nool, goroshy ii ilmy ingh ly wali hakaar la hamary taariikdii mariithy, dalkungh ii dadsheey sithii rag bathang hawaaloo ingh bathiyiingh iny dalkungh lamy wabi guthaashoo ky soohimingh dadky ky nool ii afshoo liniingh habooghy fadnee Soomaali weyn wal inghly qeebsithy lahaayeengh.
Af-yaal goroshy dheer lywu, siyaasi haky qariibiyu, haaghn ary jiifithiyu, afky aayoow Maayky ini usy li tartamy damangh bathangh masqantiis ingh shiiliyu, hooby taariik ii suughaangh wal qorangh araathy hooby luku helaaw, wal usy luku qori leey iny eyiingh eed lingh taawiyaawu, hanasoo yooby ku qoreengh dhalinyaroothy eyiingh, haanasoo yooby tabr bathangh ingh haaynee iloow kartithiyoo ii dathaalshoo intungh lyhaayi buugoo inisky sheeny Ayaal Hassan Hassan Usmaangh Anjeex linky koofaaraaw hagsheey kyhaatheengh, usy doorky dhalinyiroothy ii sithy haldoorithy usy heraayky usy qeeb ku eyi ingh neghetheengh haangh bulshithy ku jibsithaaw kolkoo mahfal usy ku hathalaayi doosheey dhenegsooyby.
May ingh tuwu waayny, ingh wiinaaysithy waayny, ilmiilighaany, afyaalnimaathy inghdheerty urothaany rooghy, haliinkoo ii lamy unku bathynaayny haalshoo nololy ii bariighalshoo si eyi hindhoo uny kyhaayny halaawsinghyi, sii ki dheethy uny gaankaany inghty deery iny hathalaangh, haalsky yoo ky jaraangh afshoo niinku sheeghaangh.
Iri amnghtii dhiyaasy waayeelkaa yoow ogaathee ya af-yaal haty nool heestiis haayty, oo usiiny af-yaalee hilmaaghny arathaany rooghdy qeeb ku eh, waany noo quursitheey dadkii usy kybeeraayi afyaalky ingh haayi uny naghaneey hindhmaa hathalby iniingh haayny.
Umutoo degengh araathoo tiroothiyoo ingyaaraaynee eny, haldoorshoo hilmaameey taariikdiyoo inqoronaayny, haanii yoo ku qoro lahaayeeghny wal yarkii ku rooghi hilmaameey hathaljhooby inghaayny, hadhoow maddii leethaangh hindhoo teeghy doony.
Hooby sithaas inghaayny, Abwaan Anjeeh, may si ingh leyi, ay ku hathaloohaayi, haldoorithungh usy sheeghoohaayi oony, usiiny may halgangh eh dartaany haangh geli, intee ogny, may kasab ii keed meel dhikithy yaraangtiis ilaa shinghsheey iny ku deeraayi.
Hagy af-yaalnimaathy ku sukoow, hal-abuurky ereyky af maayghy langh siiqiyaaw naaxiyadda keertiyee, kolkoony ky soothiyaaw si bulshithy warbaahanmty af-maayky ky dowuhaasy unku merito ereyky ky feeyly abtuggy ii ky dowohoowky, si afky maayky iniingh dhunghny hothonghnimaathy moowly lygothobwwely, iloow nasiibdory dhaghaaghaany iniingh feethinaayny.
Langh laayi kalkaal maa Af-yaal Mahamed Hassan Osmaan Anjeex, doorsheey mi inkiraaw, taariikdany my hilmaamaasy, inty walbarity dhalinyaroothy ingh bathang kurii ii gebriby, my abaaldornee amaani, yoony my hilmaanghsiny baal surughnyiingh, haaby tabardoronaatheeny, sithy usiiby sheeghy yoowu haangh ku warqaby haalsheey, iloow wali eeb ky hoobateey siyaasi hal882doorithy araathiis kolkoony reed haniighdeyaany, heraayky taariikdy ii murtithy dadsheey ii dalsheey ly nool, jiilky hadhoow kooyi doony wali dhahaly lahaayeengh taariik ii dhaghan lamaathaby haldoorkii luku reeby lahaayi inghdanaaghooyaanee hool kaly lyjethy geeky.
