Dowladda Federaalka Soomaaliya ayaa ka hadashay xaaladda siyaasadeed ee dalka, dagaalka ka dhanka ah kooxaha argagixisada, xiriirka Soomaaliya iyo Itoobiya iyo mowqifka dowladda ee ilaalinta midnimada iyo madaxbannaanida dalka, iyo arimo ku saabsan doorashooyinka dib uga dhacay waqtigeeda.
Arrimahan ayaa lagu soo qaaday wareysi uu mas’uul ka tirsan Dowladda Federaalka Soomaaliya siiyay Telefishinka Al-Carabiya.
Dowladdu waxay sheegtay inay diyaar u tahay in wada-hadal dhab ah laga yeesho arrimaha masiiriga ah ee dalka, gaar ahaan geeddi-socodka dastuurka iyo doorashooyinka soo socda.
Mas’uulka ayaa xusay in Madaxweynaha Soomaaliya Xasan Sheekh Maxamuud iyo Ra’iisul Wasaaruhu ay marar badan ku baaqeen in khilaafaadka siyaasadeed lagu xalliyo is-afgarad iyo wada-xaajood.
Dhinacyada dowladda iyo mucaaradka ayaa horey u yeeshay kulamo dhowr ah, iyadoo qodobo qaar la isku fahmay, halka kuwo kalena ay weli u baahan yihiin in laga gaaro is-afgarad.
Dowladdu waxay sheegtay inay diiddan tahay adeegsiga hubka, qalalaasaha iyo tallaabo kasta oo dhaawacaysa nabadda iyo xasilloonida bulshada, iyadoo carrabka ku adkaysay in Soomaaliya aysan dib ugu laaban karin xaaladihii burburka iyo kala-qaybsanaanta ee sagaashamaadkii.
Dagaalka ka dhanka ah kooxaha argagixisada, Dhinaca amniga, dowladda ayaa sheegtay in Ciidamada Qalabka Sida ee Soomaaliyeed ay horumar ka sameeyeen dagaalka ka dhanka ah kooxaha argagixisada, isla markaana ay xoreeyeen deegaanno ballaaran.
Hase yeeshee, dowladda waxay tilmaantay in dagaalka argagixisadu uusan ku koobnayn oo keliya furimaha dagaalka, balse uu u baahan yahay qorshe dhinacyo badan leh.
Qorshaha dowladda waxaa ka mid ah la dagaallanka fikirka xagjirka ah, ilaalinta amniga fikirka bulshada, ka hortagga wararka been-abuurka ah iyo dacaayadaha kooxaha argagixisada, dhabar-jarka ilaha dhaqaale ee kooxahaasi iyo horumarinta deegaannada la xoreeyay.
Xiriirka Soomaaliya iyo ItoobiyaWareysiga waxaa sidoo kale lagu soo qaaday xiriirka Soomaaliya iyo Itoobiya, iyadoo dowladda ay ku tilmaantay xiriirka labada dal mid derisnimo ah oo u baahan in lagu dhiso ixtiraam iyo iskaashi.
Soomaaliya waxay sheegtay inay soo dhoweynayso iskaashi dhaqaale iyo maalgashi sharci ah, balse heshiis kasta waa inuu waafaqaa madax-bannaanida Soomaaliya, midnimadeeda dhuleed iyo shuruucda Jamhuuriyadda Federaalka Soomaaliya.
Mowqifka dowladda ee midnimada Soomaaliya.
Dowladda Federaalka ayaa mar kale caddeysay mowqifkeeda ku aaddan gobollada waqooyi-galbeed ee Soomaaliya.Waxay sheegtay in Soomaaliya tahay dal keliya oo midaysan, ayna diiddan tahay tallaabo kasta oo lagu wiiqayo midnimada iyo wadajirka dhulkeeda.
Dowladdu waxay sidoo kale sheegtay in aqoonsi sharci-darro ah oo lagu beegsanayo qayb ka mid ah Soomaaliya uu xadgudub ku yahay madaxbannaanida qaranka, isla markaana uu saameyn ku yeelan karo xasilloonida gobolka, gaar ahaan amniga Badda Cas iyo Gacanka Cadmeed.
Dowladda Federaalka Soomaaliya ayaa ugu dambeyn sheegtay in mudnaanta ay siinayso xoojinta dowladnimada, ilaalinta midnimada dalka, ciribtirka argagixisada iyo xaqiijinta nabad iyo xasillooni waarta.
