Hoos Dhageyso Wrarka Duhurnimo ee Idaacada Warsan oo aqrinaayo Yuusuf SSheikh Aaden
Dagaal xoogan ayaa Ciidamada dowladda Soomaaliya iyo Xubno katirsan Ururka Al-Shabaab waxaa uu ku dhexmaray degaanka Makuude oo qiyaasti 7 KM dhanka koonfurta ka xiga Magaalada Baydhabo ee Xarunta gobolka Baay.
Dagaalka ayaa waxaa uu yimid kadib markii Xubno katirsan Al-Shabaab ay weerareen degaankaas, waxaana dagaalkii ka dhacay ka dhashay khasaaro isugu jira dhimasho iyo dhaawac.
Abaanduulaha qeybta 60aad ee Ciidamada xoogga dalka Soomaaliyeed ayaa sheegay inay fashiliyeen weerarkii kaga yimid dhinaca Ururka Al-Shabaab, isla markaana dagaalkii ay la galeen ay ku gaarsiiyeen khasaaro xoogan.
Wuxuu sheegay in ay dagaalka ku dileen 14 Xubnood oo katirsan Al-Shabaab, sidoo kalena Afar kale ay nolosho ku qabteen, isaga oo hadalkiisa intaasi kudaray inay hadda wadaan howlgallo ay ku baadi goobayaan Xubnihii katirsanaa Al-Shabaab ee soo weeraray.
Wararkii ugu dambeeyay ee naga soo gaaraya degaanka Makuude ayaa sheegaya in xaaladda ay tahay mid degan, isla markaana Ciidamada dowladda qeybta 60aad iyo kuwa Nabadsugida Koonfur Galbeed ay howlgallo ka wadaan.
Masuuliyiinta dalka Pakistan ayaa sheegay in isbuurasho ay ka dhacday xarun lagu qaybinayey cunto bilaasha oo ku taalla dekedda Koonfureed ee Karachi, waxaana goobtaas ku dhintay ugu yaraan 11 qof halka uu dhaawac soo gaadhay shan qof oo kale.
Ciidamada booliska iyo kooxaha gurmadka ayaa sheegay in badi dadka uu dhaawaca iyo dhimashadu soo gaadhay ay yihiin haween iyo caruur.
Isbuurashadan ayaa ka dhacday barxadda wershedda Karachi, halkaas oo la doonayey in shaqaalaha loogu qaybiyo cunto bilaash ah, bishan barakaysan ee Ramadaanta awgeed. Hase ahaate boqollaal qof ayaa ka soo buuxsamay goobta kuwaas oo ku soo qabaabay inay saami ka helaan cuntada, waxaana goobta ka bilawday is-riixriix, sida ay sheegeen goobjoogayaal iyo laamaha ammaanku.
Dalka Pakistan oo ay ku nool yihiin in ka badan 230 milyan oo qof ayaa la baaxaa degaya duruufihii dhaqaale ee ugu xumaa ee soo foodsaara muddo tobanaan sano ah.
Ra’iisal wasaaraha xukuumadda Pakistan ayaa ku dhawaaqay in bisha barakaysan daqiiq bilaasha la gaarsiiyo malaayiin qof oo sabool ah, si ay uga soo kabtaan sicir bararka saamaynta ku yeeshay.
Tartan aqooneedkii caawa u dhaxeeyey Xaafadaha kala Wadajir B iyo Bardaale A ayaa waxa forfeit 14 dhibcood ku guuleytey Bardaale A,ka dib markii ay tartamayaasha Wadajir B ay ku xadgudbeen habraca Sharuucda u dagsan tartanka.
Hoos ka dhageyso Warka Galabnimo ee Idaacada Warsan oo aqrinaayo Yuusuf Sheikh Aaden.
Wafdi uu hugaaminayo Guddoomiyaha Hay’adda Maareynta Musiibooyinka Qaranka Mudane Maxamuud Macalin Cabdulle ayaa Maanta Gaaray Magaalada Xudur ee Caasimada Gobolka Bakool oo uu dhawaan ka da’ay Roob xoogan oo dhamaan xiray isku socodka gaadiidka iyo Ganacsiga qeybo kamid ah Xafadaha Magaaladaas taas oo sameen ku yeelatay dadka dantayar ee ku nool halkaas.
Wafdiga Guddoomiyaha waxaa qeyb ka ahaa Wasiirka Gargaarka Maamulka Koonfur Galbeed Cabdinaasir Cabdi Caruush,waxaana halkaas ku soodhaweeyey Maamulka Degmada Xudur iyo golaha deegaanka Magalaadas.
Guddoomiyaha oo halkaas gaarsiiyey diyaarad wada shixnad mucaawino ah oo dhan 7-tan ayaa u kuur galay saameenta xafadaha uu biyaha Roobka kala xiray isaga oo dadka deegaanka oo xafadahooda biyaha dhex jiifan mid mid u tulgay kana wareestay xaaladaha ay haaatan wajahayaan.
Kadib dagaal xoogan oo duleedka Magaalada Laas-Caanood ee Xarunta Gobolka Sool ku dhexmaray Ciidamada Somaliland iyo kuwa la magac baxay SSC ayaa waxaa tiro madaafiic ah ay ku dhaceen Xafado katirsan Magaalada Laas-Caanood.
Taliyaha Ciidanka Birjeex Ee Gobolka Mudug uga tegay dagaalka Laas-Caanood Gaashaanle Dhexe Maxamed Cabdillahi Xersi Tahliil ayaa sheegay in Ciidamada Somaliland ay soo weerareen Saldhigyada Ciidamada SSC, isla markaana dagaalkii ay la galeen ay gaadiid uga gubeen.
Wuxuu sheegay Sarkaalka in weerarkii ay kusoo qaadeen kadib ay tiro madaafiic ah u qeybiyeen magaalada Laas-Caanood, kuwaas oo qaarkood burbur xoogan u geystay Xarunta Maamulka Magaalada Laas-Caanood, isaga oo ku hanjabay inay ka guuleysan doonaan.
Wararka Risaala ay ka heleyso goobaha lagu dagaalamay ayaa sheegaya in uu jiro khasaaro dhimasho iyo dhaawac ah oo labada dhinac kasoo gaaray dagaalka iyo khasaaro dhaawac ah oo ka dhashay hoobiyeyaasha Ciidamada Somaliland ku garaaceen Magaalada Laas-Caanood.
Dagaalka Maanta ka dhacay duleedka Magaalada Laas-Caanood ee Xarunta Gobolka Sool ayaa kusoo aadaya xilli Mareykanka war kasoo baxay loogu baaqay dhinacyada ku dagaalamay Magaalada inay joojiyaan dagaalka.
Hoos ka dhageyso Warka Duhurnimo ee Idaacada Warsan oo aqrinaayo Yuusuf Sheikh Aaden.
Ra’iisul Wasaarihii hore ee Kenya Raila Odinga ayaa sheegay in 7 xabadood lagu dhuftay gaarigiisa maalintii Khamiista oo ay socdeen mudaaharaadyo looga soo horjeedo dowladda Kenya, wuxuuna sheegay in taasi ay ahayd isku day naftiisa lagu doonayay.
Wareysi uu siiyay warbaahinta ayuu Mr Odinga ku sheegay in booliisku ay beegsadeen gaarigiisa iyo kuwa kale oo ay la socdeen hoggaamiyeyaasha mucaaradka intii ay socdeen dibadbaxyo ka dhacayay xaafadda Eastland ee magaalada caasimadda ah ee Nairobi.
Waxa uu sidoo kale ku eedeeyay booliiska in ay beegsadeen saxafiyiinta intii ay socdeen mudaaharaadyada ka dhanka ah dowladda, waxa uuna ku andacooday in ay jiraan qorshayaal lagu weerarayo xafiisyada kooxda hormuudka u ah adeegga warbaahinta Royal ee magaalada Nairobi.
Mr Odinga ayaa beesha caalamka ku dhaliilay in ay iska indha tireen xad-gudubyada ka dhanka ah xuquuqda aadanaha. Waxa uu sheegay in mucaaradku ay qaban doonaan mudaaharaad weyn 3-da Abriil.
Lix wariye ayaa ku dhaawacmay mudaaharaadyadii Khamiista, taasoo kor u qaaday tirada shaqaalaha warbaahinta ee ku dhaawacmay tan iyo markii mudaharaadku bilaabmay isbuucii hore.
“Maraykanku waxa uu aad uga walaacsan yahay warbixinadii ugu dambeeyay ee weerarrada ka dhanka ah saxafiyiinta, ilaalinta xorriyadda saxaafadda iyo badbaadada waa tiir-dhexaadka dimuqraadiyadda,” ayuu danjire Meg Whitman ku soo qoray bartiisa Twitter-ka subaxnimadii Jimcaha.
Wararka naga soo gaaraya Magaalada Laas-Caanood ee Xarunta Gobolka Sool ayaa sheegaya in halkaasi uu ka socdo dagaal u dhaxeeya Ciidamada Somaliland iyo kuwa xoogaga la magac baxay SSC, kuwaas oo ku dagaalamaya duleedka Magaalada.
Dagaalka ayaa waxaa uu yimid kadib markii Ciidamada Somaliland oo dhaq dhaqaayo ciidan ka wada duleedka Bari ee Magaalada Laas-Caanood ay weerareen xoogaga SSC, waxaana goobjoogayaal ay sheegeen in dagaalka xoogiisu uu yahay mid madafiic leys weydaarsanayo.
Waxaa jira khasaaro dhimasho iyo dhaawac ah oo ka dhashay dagaalka Maanta, iyada oo xaafadaha qaaree Magaalada Laas-Caanood ay ku dhaceen tiro madaafiic ah wallow badi dadkii deganaa Magaalada ay billaawgii dagaallada ka barakaceen.
Maalmihii la soo dhaafay waxaa gurmadyo kala duwan uu soo gaarayay dhinacyada ku dagaalamaya duleedka Magaalada Laas-Caanood, taas oo cabsi gelisay dadka Shacabka ah, waxaana dagaalka Maanta uu kusoo aadayaa xilli Odayaal ka tegay Magaalada Muqdisho ay bilaabeen waan waan lagu dhex-dhexaadinayo dhinacyada dagaalamay.
Dhinaca kale Maraykanka ayaa si isa soo taraya uga walaacsan rabshadaha sii socda ee Lascanood waxayna ku biiraan saaxiibada kale ee caalamiga ah ee ku baaqaya in xiisadda la dejiyo, loona hoggaansamo xabbad-joojinta lagu heshiiyey, gargaarka bani’aadamnimo oo aan la carqaladayn, iyo dib u bilaabista wadahadal wax ku ool ah oo lagu xallinayo colaada.
“ Rabshadaha sii socda waxay kordhin doonaan suurtagalnimada kooxaha xagjirka ah inay abuuraan xasillooni darro ballaaran oo ay uga sii dari doonaan dhibaatada bini’aadantinimo ee socota ayaa lagu yiri” Warsaxaafadeed kasoo baxay Wasaaradda Arrimaha dibadda Mareykanka.
Waxaanu ugu baaqaynaa Somaliland inay dib u soo celiso ciidamadeeda ammaanka si ay u muujiyaan sida ay uga go’an tahay mabaadi’daas. Waxaan ugu baaqaynaa maleeshiyaadka ku sugan Laascaanood inay ka waantoobaan falalka guracan ee ka dhanka ah ciidamada Somaliland. Waxaan taageersanahay qorshaha ay wado dawladda Faderaalka ee Soomaaliya iyo daad-gureynta ergada odayaasha beelaha, waxaana soo dhawaynaynaa ballan-qaadkii Madaxweynaha Somaliland Biixi ee ahaa inuu wefdiga kula kulmo Hargeysa ayaa lagu soo geba-gabeeyay Warsaxaafadeedka.