Baydhowy-{WMN}-Hoos ka dhageyso Warka Duhurnnimo ee Idaacada Warsan oo aqrinayo Abdiraxmaan Maxamed Axmed
Baydhowy-{WMN}-Waxaa lagu wadaa in Maanta oo Arbaco ah Magaalada Muqdisho ay gurmadyo Caafimaad oo kala duwan soo gaarsiiyaan dowladaha Jabuuti iyo Turkiga oo kamid ah dowladaha taageera Soomaaliya.
Wasiirka Wasaaradda Caafimaadka ee dowladda Soomaaliya ayaa sheegay in shalay qorshuhu ahaa in dowladda Turkiga ay Muqdisho u soo dirto diyaarad qaadi laheyd Afar qof oo qaba dhaawac culus, balse ay u baaqatay Hawada Itoobiya oo xumaatay, hayeeshee Maanta ay imaaneyso diyaaradaas, isla markaana ay qaadi doonto Afar kamid ah dadkii ku dhaawacmay qaraxyadii Soobe.
Dhinaca kale waxaa xafiiska Ra’iisul Wasaaraha Jabuuti lagu qabtey kulan la xiriira sidii kaalmo caafimaad iyo gurmad loogu fidin lahaa dadka ku dhaawacmey weerarkii isgoyska Soobe ee magaalada Muqdisho.
Kulanka ayaa lagu go’aamiyey in maanta oo Arbaca ah gargaar loo diro Soomaaliya, sida uu sheegay Ra’iisul Wasaaraha Jabuuti, iyaga oo ka jawaabaya codsigii dowladda Federaalka ah ee Soomaaliya.
Baydhowy-{WMN}-Madaxweynaha Jamhuuriyadda Federaalka Soomaaliya Mudane Xasan Sheekh Maxamuud oo dalka Al-jeeriya uga qeyb galaya Shir Madaxeedka dalalka Jaamacadda Carabta ayaa halkaas kulan kula qaatay Xoghayaha Guud ee Qaramada Midoobey António Guterres, isaga oo kala hadlay dagaalka dowladdu ay kula jirto Al-shabaab iyo muhiimadda ay leedahay taageerada beesha caalamka si loo soo af-jaro.
Madaxweynaha ayaa Xoghayaha guud la wadaagay horumarada ciidamada Soomaaliyeed oo kaashanaya Shacabka ay ka sameeyeen dagaalka ka dhanka ah Al-Shabaab, waxa uuna xusay In cunaqabateynta hubka oo laga qaado Soomaaliya ay si weyn u caawineyso dagaalka lagu hayo Argagixisada Somaaliya, tan Gobolka iyo Caalamka.
Madaxweynaha Jamhuuriyadda oo tilmaamay in dowladdiisa ay ka go’an tahay ciribtirka Al-Shabaab ayaa Qaramada Midoobay ka codsaday in ay sii kordhiso taageerada bani’aadannimo iyo tan farsamo ee ay siiyaan dowladda Soomaaliya si loo xaqiijiyo xasiloonida dalka iyo in ciidanka Soomaaliyeed ay la wareegaan kuna filnaadaan ammaanka dalka.
Xoghahaya Qaramada Midoobey António Guterres ayaa bogaadiyay sida dowladda dhexe iyo dowladaha xubnaha ka ah ay uga mideysan yihiin ammaanka dalka iyo dhammeystirka dowlad dhiska Soomaaliya, isaga oo intaas ku daray in Qaramada Midoobay ay Soomaaliya ka taageerayaan dagaalka Al-Shabaab, tayeynta ciidanka qalabka sida iyo arrimaha la xiriira Isbedelka cimilada iyo deegaanka.
Madaxweynaha Jamhuuriyadda Federaalka Soomaaliya Xasan Sheekh ayaa ugu dambeyn uga mahadceliyey Qaramada Midoobey taageerada ay siiyaan dowladda Federaalka Soomaaliya, waxa uuna adkeeyay in ay sii wadaan garab istaagga ay dalka iyo dadka Soomaaliyeed u muujiyeen.
Baydhowy-{WMN}-Madaxweynaha dowlad Goboleedka Puntland Siciid Cabdullaahi Deni oo kusugan Magaalada Muqdisho ayaa xalay kulan is cafin ahaa la qaatay qaar kamid ah 8-dii xildhibaan ee laga saaray Baarlamaanka Puntland 3 Dec 2020 kadib mooshinkii uu abaabulay Madaxweyne Siciid Deni.
Wararka la helay ayaa sheegaya in kulanka Madaxweynaha iyo xildhibaannadii la eryay uu qaban-qaabiyay Guddoomiyihii hore ee Baarlamanka Puntland Cabdixakiin Dhoobo Daareed oo isaga laftirkiisa mooshin abaabulan xilkii iyo Xubinimadii Baarlamaanka Puntland looga qaaday.
Guddoomiyihii hore ee Baarlamanka Puntland Cabdixakiin Dhoobo Daareed ayaa waxaa xilka laga qaaday 7-dii Bishii Novemberee sanadkii 2019-kii, iyada oo sidoo kale gebi ahaanba Baarlamaanka laga saaray 10 December 2019 kadib mooshin uu gadaal ka riixayay Madaxweynaha Puntland Saciid Cabdullaahi Deni.
Ugu dambeyn 10-kii Bishii May ee sanadkan 2022 ayay Magaalada Muqdisho ku kulmeen Madaxweynaha Puntland iyo Guddoomiyihii hore ee Baarlamanka Puntland Cabdixakiin Dhoobo Daareed, iyada oo xiligaas Madaxweyne Deni oo ahaa musharax Madaxweynaha Soomaaliya uu ka dalbaday Cabdixakiin Dhoobo Daareed in wixii dhacay ka heshiiyaan, taas oo uu aqbalay.
Baydhowy-{WMN}-Madaxweynaha Jamhuuriyadda Federaalka Soomaaliya Xasan Sheekh Maxamuud ayaa ka qaybgalay furitaanka meertada 31-aad ee Shir-madaxeedka Ururka Jaamacadda Carabta oo ka furmay magaalada Aljeris ee dalka Aljeeriya.
Madaxweynaha Jamhuuriyadda ayaa shirkan ka jeedin doona khudbad uu kaga hadlayo dhibaatooyinka Al-Shabaab ay ku hayso nabadda, horumarka iyo dowladnimada Soomaaliya iyo sidoo kale guulaha dawladda iyo shacabka oo wadajira ay ka xaqiijiyeen dagaalka dalka looga saarayo.
Madaxweynaha ayaa inta uu ku sugan yahay Aljeeriya waxa uu kulan doceedyo la yeelan doona Madaxda dalalka Carabta, hoggaanka hay’adaha iyo ururrada caalamiga ah ee ka soo qeybgalay meertadan.
Madaxweynaha waxaa ku wehelinaya shirkan, Wasiirka Wasaaradda Arrimaha Dibadda iyo Iskaashiga Caalamiga Abshir Cumar Huruuse, Wasiirka Wasaaradda Maaliyadda Dr. Cilmi Maxamed Nuur, Safiirka Soomaaliya ee dalka Masar ahna Wakiilka Soomaaliya ee Ururka Jaamacadda Carabta Danjire Ilyaas Sheekh Cumar Abuubakar iyo Safiirka Soomaaliya ee dalka Aljeeriya mudane Danjire C/wahaab Macallim Maxamed.
Hoosk ka dhageyso Warka Subax ee Idaacada Warsan oo aqrinayo Bilal Hilal Shueb
Maraykanka ayaa sannadkii 2018-da liiska ururrada argagixisada ku daray ururka Daacish ee Soomaaliya.
Shaqsiyaadka cunaqabataynta la saaray waxaa ku jira Cabdirahman Mohamed Cumar, oo lagu eedeeyey inuu xubin ka yahay Daacishta Soomaaliya, iyo inuu yahay xubinta ugu firfircoon ee laga soo bilaabo 2020-kii hubka sharcidarada ah kasoo dejiya Puntland, sida ay qortay Reuters.
Waxaa sidoo kale cunaqabatayn la saaray Ciise Mohamoud Yusuf, oo lagu eedeeyey inuu hubka iyo saadka ufududeeyo Al-Shabaab, islamarkaana uu soo geliyo Puntland hub.
Waxaa sidoo kale cunaqabatayn la saaray Cabdirahman Faahiye oo lagu sheegay inuu yahay Amiirka Daacish Soomaaliya, iyo Maxamed Axmed Qaxiye oo la sheegay inuu yahay madaxa Amniyaatka.
Wasiirka Wasaaradda Gaashaandhigga Xukuumadda federaalka Soomaaliya iyo wafdi uu hogaaminayo oo booqasho rasmi ah ku jooga Wadanka Suudaan ayaa lakulmay Wasiirka Gaashaandhigga Jamhuuriyadda Suudaan ee aan walaalaha nahay Sareeyo Guud Yaasiin Ibraahim Yaasiin.
Labada Wasiir ayaa ka wada hadlay xoojinta xiriirka iyo iskaashiga soo jireenka ah ee ka dhaxeeyo labada dal ee Walaalaha ah iyo sidii Soomaaliya looga taageeri lahaa la dagaallanka Al-Shabaab.
Wasiirka Gaashaandhigga Soomaaliya Cabdiqaadir Maxamed Nuur Jaamac ayaa uga mahadceliyay Dhiggiisa Dalka Suudaan iyo Taliyeyaasha kale ee ciidamada qalabka sida ee Dalkaas sida diiran ee ay u soo dhaweeyeen Wafdigiisa.
Baydhabo-{WMN}-Barnaamijka Kulanka Warsan waxaad Caawa kaga boganidoontaan Wareeysiyo aad xasaasi u ah, khudbadiha shirarkii maanta Madaxda Somaliya ay ku qabteen Dalka iyo dibadiisa. waxaa Caawa soo saarey soona jeedinaaya Wariye Mohamuud Ali Abdullahi (Gaabshaa} Dhageysi wanaagsan.
Ra’iisul Wasaaraha Xukuumadda Federaalka Soomaaliya Mudane Hamza Abdi Barre ayaa kulan la qaatay xubno ka socday Ganacsatada Soomaaliyeed oo uu kala hadlay kaallinta kaga aadan Gurmadka iyo taakuleynta dadkii ku wax yeeloobay qaraxii bahalnimo ee khawarijtu ku gumaadeen shacabka aan waxba galabsan 29kii bishii dhammaatay.
Kulanka oo ay goob joog ka ahaayeen guddiga heerka wasiir iyo Guddoomiyaha Gobolka Banaadir ee gurmadka ayaa diiradda lagu saaray doorka ganacsatadu ay ku leeyihiin samatabixinta iyo midaynta kaalmaha dhaqaale ee lagu taakuleynayo dadka ay wax yeelladu ka soo gaartay qaraxii dhawaan ka dhacay Muqdisho.
Ra’iisul Wasaare Xamse oo ganacsatada ugu mahad celiyey doorkooda muuqda, ayaa xusay in wadajir xoogga loo saaro sidii shacabka loogu gurman lahaa, dowladduna ay qaaday tallaabooyin wax ku ool ah, lana sii wadi doono howlaha gurmadka, shacabka Soomaaliyeedna looga baahan yahay in ay sii kordhiyaan gurmadka iyo dadaalka ay wadaan.