Tababarkan ayaa ahaa mid wariyayaasha ku baranayeen sida loo tabiyo doorashooyinjka, iyadoo dhowaan la filayo in ay doorasho ka dhacdo magaalada Baydho, taasoo ay ku tartami doonaan lix musharax oo gudiga doorashooyinka KG siiyeen shahaadooyinka musharaxnimada madaxweynaha KG, kadib markii ay buuxiyeen shuruudihii laga doonayay.
Tababarkan oo ay soo agaasintay hay’adda Creative International oo gacan ka helaysa Hay’adda USAID ee fadhigeedu yahay Maraykanka, ayaa furitaankiisii ay ka soo qayb galeen mas’uuliyiin kala duwan oo ka socotay xarumaha warbaahinta, ururka suxufiyiinta KG iyo la taliyahii madaxweynahii hore KG ee arimaha Amniga, Siyaasadda iyo Bulshada.
Hilaal Sheekh Shuceeb oo ah agaasimaha Idaacadda ugu faca weyn KG ee Warsan, ayaa hadalo kooban uu meesha ka soo jeediyay, waxaa uu ku booriyay wariyayaasha in ay ka faa’idaystaan tababarka ay fursadda u heleen oo ay ku baran doonaan daruus muhiim u ah mihnadda warbaahinta ay ku hoowlanyihiin, isla markaana si fiican u dhagaystaan sharaxaadda macalimiinta casharka bixinaysa oo uu u sheegay wariyayaalka in ay yihiin kuwo heer sare ka gaaray warbaahinta.
Gudoomiyaha ururka Suxufiyiinta KG Muxudiin Xasan Maxamed Xusni oo isna furitaankii tababarka ka hadlay ayaa ugu horaynba uga mahad celiyay hay’adaha iskaashanaya iyo macalimiinta tababarka bixinaya waqtiga ay ku soo beegeen tababarka wariyayaalka KG lagu barayo sida loo tabiyo wararka doorashooyinka.
Waxaa uuna sidoo kale gudoomiyaha kula dardaarmay ardadad in aysan luminin fursaddan qaaliga ah ee iyagoo joogo magaaladooda nasiibka u yeesheen, taasoo gudoomiyaha ururka suxufiyiinta KG Mr. Xusni ku tilmaamay in ay tahay mid mudan in laga faa’idaysto si ay u wariyayaasha u soo tabiyaan warar bulshada ku xiran wararkooda dhagahooda ugu dhibciyaan warar aan xanaf lahayn, dhex dhexaad ah lagana dareemayn dhinac in ay u janjeeraan.
Tababrkan oo socday hal maalin ayaa ahaa mid ay bixinayaan casharida tababarayaal aqoon iyo khibrad durugsan u leh warbaahinta kuwaasoo muddo sanooyin ah ku soo dhex jiray mihnadda saxaafadda. Waxaana ka mid ahaa macalimiinta Maxamed Ibraahim Macalimoow oo ah gudoomiyaha ururka Suxufiyiinta Qaranka Soomaaliyeed ee NUSOJ oo lagu xasuusto laanta Af-Soomaaliga BBC da oo uu muddo u soo shaqaynayay.
