Somaliya{WMN}-Xoghayaha Gaashaandhigga Britain Gavin Williamson ayaa booqasho ku tegey caasimada dalka Soomaaliya ee Muqdisho iyo magaalada Hargeysa ee xarunta Maamulka Somaliland.
Gavin Willamson ayaa booqashada uu ku tegey caasimada dalka ee Muqdisho waxa uu garoonka diyaaradaha kula kulmay diblumaasiyiinta u joogta dalka Britain wadanka Soomaaliya iyo saraakiil ka tirsan ciidamada Britain ee ku sugan magaalada Muqdisho.
Sidoo kale waxaa uu Xoghayaha Gashaandhiga Britain Gavin Willamson uu booqasho ku tegey maanta magaalada Hargeysa ee xarunta Maamulka Somaliland.
Wafdiga uu horkacayay Xoghayaha Gaashaandhiga Britain Gavin Willamson ayaa la kulmay Madaxweynaha Soomaaliland Muuse Biixi Cabdi.
Booqashada uu Xoghayaha Gaashaandhiga Britain ku tegey magaalada Hargeysa ayaa noqonaysa safarkii u horeeyey ee masuul haya xilka wasiirka difaaca Britain uu ku tago magaalada Hargeysa tan iyo markii uu maamulkaas ku dhowaaqay in uu ka go’ay dalka Soomaaliya.
Lama oga ujeedka uu Xoghayaha Gaashaandhiga Britain uu ku tegey magaalooyinka Muqdisho iyo Hargeysa balse waxa ay ku soo beegmeysaa iyadoo dhowaan dowlada Soomaaliya ay eriday ergeygii Qaramada Midoobay ee dalka Soomaaliya.
Dalka Britain ayaa ka mid ah shanta dal ee leh codka diidmada qayaxan kana mid ah Golaha Ammaanka,waxaana dowlada Ingiriiska uu Golaha Ammaanka u xilsaaray in uu soo diyaariyo qaraar uu ka qaadanayo Golaha Ammaanka eryida danjira Haysom.