Xubno ka tirsan Ururka Al-Shabaab ayaa waxaa la sheegay inay weerareen Saldhigyo Ciidamo ka tirsan Millateriga Soomaaliya ku leeyihiin degmada Buurdhuubo ee Gobolka Gedo,waxaaana halkaasi ka dhacay dagaal socday ku dhawaad Saacad.
Dadka degmada qaarkood oo la hadlay Warsan News ayaa waxaa ay sheegeen inay maqlayeen dhawaqa rasaasta ay isku adeegsanayeen labada dhinac,hayeeshee aysan cadeyn karin khasaaraha kala gaaray maadaama ay aheyd xilli habeen ah oo aan wax badan la ogaan karin.
Taliyaha amniga magaalada Buurdhuubo Nuur Kediye Ibraahim ayaa Warbaahinta Dowladda u sheegay inay ka hortageen weerarkii ay kusoo qaadeen Al-Shabaab,isla markaana ay khasaro gaarsiiyeen sida uu hadalka u dhigay.
Sidoo kale wuxuu tilmaamay in uusan jirin wax khasaare ah oo dagaalkaas ka soo gaaray ciidamada xoogga maadaama ay markii horeba ciidanku hayeen xogta tilmaamaysa in Xubno Shabaab ah kusoo wajahan yihiin.
Degmooyin badan oo ka tirsan Gobolka Gedo oo ay horay ugu sugnaan jireen Ciidamada Maamulka Jubbaland ayaa waxaa hadda gacanta ku haya Ciidamo ka tirsan kuwa dowladda Soomaaliya,waxaana mararka qaar ay weeraro kala kulmaan Al-Shabaab.