Maamulka iyo laamaha Amniga dowlad degaanka Soomaalida Itoobiya ayaa Taliska guud ee Ciidamada Booliska Puntland kusoo wareejiyay Nin dil ka geystay degaanka Milxo oo katirsan Gobolka Sanaag.
Taliyaha qeybta Booliska Gobolka Mudug ee Puntland Korneyl Muumin Cabdi Shire oo Wakiil ka ahaa Taliyaha Ciidamada Booliska Puntland ayaa Ninka dilka geystay kala wareegay Taliyaha Gobolka Doollo Gaashaanle Mowliid iyo Maamulka Dowlad deegaanka Soomaalida Dalka Itoobiya.
Ninka Taliska Booliska Puntland lagu wareejiyay ayaa dil ugu geystay degaanka Milxo qof Shacab ah, waxaana uu u baxsaday dhinaca dowladda degaanka Soomaalida, balse ugu dambeyn ay qabteen laamaha Amniga degaanka oo ay la xiriireen Saraakiisha Ciidamada Booliska Maamulka Puntland.
Taliyaha Qeybta Booliska Gobolka Mudug ee Puntland Korneyl Muumin Cabdi Shire ayaa u mahad celiyay Maamulka dowlad degaanka Soomaalida iyo taliska Booliska degaanka, isaga oo sheegay inay sii xoojin doonaan wadashaqeynta ay Maamulkaas la leeyihiin.
Dhowr jeer oo hore ayaa waxaa heshiis amni uu dhexmaray Taliska Ciidamada Booliska dowlad Goboleedka Puntland iyo kan degaanka Soomaalida, iyaga oo ku guuleystay inay isku wareejiyaan dad dilal geystay.
