Baydhabo-{WMN}-Madaxweynaha dowlad Goboleedka Jubbaland Axmed Maxamed Islaam Axmed Madoobe ayaa War kasoo saaray geeridii ku timid Wasiirkii Arimaha gudaha iyo dib u heshiisiinta Jubbaland Maxamed Warsame Darwiish oo ku dhintay dalka Jarmalka.
Madaxweyne Axmed Madoobe oo Qoraal soo saaray ayaa waxaa uu tacsi ugu diray ehelka, qaraabada, qoyskii uu ka baxay Marxum Maxamed Darwiish, dhamaan ummada Soomaaliyeed iyo shacabka Jubbaland.
Wuxuu xusay inuu Marxuumka heerar kala duwan uga soo shaqeeyay dalka gaar ahaana Jubbaland, isla markaana uu kamid ahaa aas aasayaashii wakhtigooda iyo aqligoodaba u huray dhismaha Jubbaland iyo dadaaladii Dowlad dhiska ahaa ee ka danbeeyay.
Sidoo kale Madaxweynaha ayaa tilmaamay in Darwiish uu qeyb weyn ku lahaa sal u dhigida Wasaaradahii uu soo maamulayay wakhtiyadii lasoo dhaafay iyo howlahii baaxada lahaa ee uu u hayay shacabka Jubaland.
“Waxaan Allaah uga baryayaa in uu Jannatul Firdowsa ka waraabiyo, samir iyo iimaanna ka siiyo ehelkii, asxaabtii, dhammaan Ummadda Soomaaliyeed iyo Bulshada Jubaland ee uu ka baxay alle ha u naxariistee marxuumka” ayuu yiri Madaxweyne Axmed Madoobe.
Allaha u naxariistee Wasiirkii Arimaha gudaha Federaalaynta iyo dib u heshiisiinta Jubbaland Maxamed Warsame Darwiish ayaa Maanta ku geeriyooday Isbitaal ku yaalla dalka Jamalka oo uu maalmihii lasoo dhaafay ku xanuusanayey.