Wasiirka Gaashaandhigga XFS, Danjire Ahmed Moallim Fiqi, ayaa maanta si rasmi ah xarunta Warbaahinta ee Wasaaradda uga daahfuray tababar loogu talagalay diyaarinta iyo mideynta qorshaha warbaahineed ee Wasaaradda Gaashaandhigga iyo Ciidanka Qalabka Sida. Tababarkan oo socon doona muddo saddex maalmood ah, ayna bixinayaan khubaro warbaahineed, waxaa ka qaybgalaya howlwadeenada warbaahinta ee CXD iyo Wasaaradda, iyadoo yoolku yahay in la xoojiyo awoodda gudbinta fariimaha la xiriira amniga iyo difaaca dalka.
Ujeeddooyinka tababarkan waxaa ka mid ah mideynta fariimaha dagaalka ka dhanka ah Khawaarijta, dhisidda kalsoonida iyo wacyigelinta bulsho oo ku aaddan la dagaallanka fikirka xagjirka ah. Wasiir Fiqi ayaa carrabka ku adkeeyay muhiimadda ay leedahay in Wasaaradda iyo Ciidanku yeeshaan cudud warbaahineed oo midaysan, isagoo xusay, “Ciidan xooggan waxay guulo ka gaaraan goobta dagaalka – bulsho wacyi lehna waxay ku guulaysataa dagaalka oo idil.” Wuxuuna intaa ku daray in la doonayo in bulshada iyo caalamka loo bandhigo “safarkeena nabadeed iyo isku filnaansho.”
Gabagabadii, Wasiirka Gaashaandhigga ayaa sheegay in himilada dhow ay tahay in Xarunta Warbaahinta ee Wasaaraddu ay noqoto il-wareed caalami ah oo lagu kalsoonaan karo oo laga helo dhammaan xogaha la xiriira amniga iyo difaaca Soomaaliya. Tababarkan ayaa sidoo kale hiigsanaya in la xoojiyo iskaashiga, isla markaana la dhiirrigeliyo taageerada shacabka ee dagaalka dalka looga sifeynayo Khawaarijta, si loo gaaro Soomaaliya nabad ah oo xasiloon.
