Wasaaradda Beeraha iyo Hay’adda Somalia Water and Land Information Management (SWALIM) ayaa khariidad ku sameeyay in ka badan 10.4 milyan oo hektar oo ku yaalla marinnada wabiyada Juba iyo Shabeelle, taas oo muujinaysa isbeddello muhiim ah oo ku yimid isticmaalka iyo daboolka dhulka Soomaaliya intii u dhaxaysay 2007 iyo 2026.
Xogta ku jirta khariidadda ayaa tilmaamaysa in dhulka beeraha iyo dhirta la maareeyo (Cultivated & Managed Vegetation) uu kordhay 20 boqolkiiba, isagoo ka soo kacay 1.60 milyan hektar sanadkii 2007 una gudbay 1.92 milyan hektar sanadkii 2026.
Kororkaas ayaa muujinaya ballaarinta wax-soo-saarka beeraha iyo isticmaalka dhulka ee labada marin-wabi, waxaana xogtan loo arki karaa saldhig muhiim u ah qorsheynta beeraha, maalgashiga iyo maaraynta khayraadka dabiiciga ah.
Dhirta dabiiciga ah oo yaraatay
Dhanka kale, khariidaddu waxay muujinaysaa in dhirta dabiiciga ah ee dhulka iyo biyaha (Natural Vegetation) ay hoos uga dhacday 8.80 milyan hektar sanadkii 2007 ilaa 8.23 milyan hektar sanadkii 2026, taas oo u dhiganta hoos-u-dhac dhan 6 boqolkiiba.
Isbeddelkan ayaa muujinaya in qayb ka mid ah dhulka dabiiciga ah loo beddelay isticmaalyo kale, gaar ahaan dhul-beereed iyo deegaano ay dadku deggan yihiin.
Magaalooyinka iyo deegaannada la deggan yahay oo si weyn u ballaaranayaMid ka mid ah isbeddellada ugu waaweyn ayaa laga arkay Artificial Surfaces, oo ay ku jiraan magaalooyin, garoomo diyaaradeed iyo deegaanno barakacayaal.
Dhulka noocan ah ayaa ka kordhay qiyaastii 13,656 hektar sanadkii 2007 ilaa 106,333 hektar sanadkii 2026, taas oo ka dhigan in uu kordhay in ka badan lix jeer.Sidoo kale, dhulalka biyuhu daboolaan ayaa kordhay 150 boqolkiiba, laga bilaabo 0.02 milyan hektar ilaa 0.05 milyan hektar.
Xog muhiim u ah mustaqbalka beerahaKhariidaddan ayaa bixinaysa sawir ballaaran oo ku saabsan sida dhulka ku teedsan labada webi ee Juba iyo Shabeelle isu beddelay ku dhowaad labaatan sano.
Xogta ayaa muhiim u noqon karta qorsheynta wax-soo-saarka beeraha, maalgashiga waraabka, maaraynta biyaha, ilaalinta dhirta dabiiciga ah iyo qorsheynta magaalooyinka iyo deegaannada dadka.
Wasaaradda Beeraha iyo SWALIM waxay xogtan uga faa’iidaysan karaan in si cilmiyeed loo qiimeeyo halka ay ku habboon yihiin maalgashiyada beeraha iyo meelaha u baahan in xoogga la saaro ilaalinta khayraadka dabiiciga ah.
Guud ahaan, xogtu waxay muujinaysaa laba isbeddel oo waaweyn: dhulka la beero oo kordhaya iyo dhulka dabiiciga ah oo yaraada, halka magaalooyinka iyo deegaannada bani’aadamku isticmaalo ay si aad ah u fidayaan.
