RW Xamse” Waxaan u baahan nahay Siyaasad degan oo kalsooni ka dhex abuurta madaxda”

Baydhabo-{WMN}- Ra’iisul Wasaaraha Xukuumadda Federaalka ah ee Soomaaliya Xamsa Cabdi Barre ayaa sheegay in ujeedka koowaad ee Xukuumadda uu soo dhisi doono ay noqon doonto siyaasad degan oo kalsooni ka dhex abuurta madaxda dowladda dhexe iyo dowlad gobolleedyada kajira dalka

Ra’iisul Wasaaraha oo kulamo wadatashi ah ka wada Muqdisho wuxuu sheegay in Bulshada Soomaaliyeed iyo Xukuumadda ay isku si u wada Shaqeyn doonaan, isla markaana Xukuumaddiisa ay ku Shaqeyn doonto waxkasta oo saameeynaya Shacabka si ay u helaan Shaqo wanaagsan ayna kaga duwanaan doonaan Xukuumadihii ka horreeyay.

Sidoo ke wuxuu hadalkiisa uu intaasi kudaray in dhibaatada heysata Shacabka ay keentay siyaasad xun iyo Siyaasiyiin aan heshiis aheyn, si taasi looga gudbana ay muhiim tahay inay heshiis yihiin Madaxda dowladda Federaalka & dowlad Goboleedyada.

Hadalkan kasoo yeeray Ra’iisul Wasaaraha Soomaaliya ayaa kusoo aadaya xilli dhowrkii sano ee la soo dhaafay khilaaf u dhaxeeyay siyaasiyiinta Soomaaliyeed ay keentay inay dib u dhacdo doorashada Soomaaliya.