Guddoomiyaha Aqalka Sare ee Baarlamaanka Soomaaliya Senator Cabdi Xaashi Cabdullaahi ayaa maanta oo Axad ah xafiiskiisa ku qaabilay Danjiraha Dowladda Qatar u fadhiya Soomaaliya Danjire Xasan Bin Xamze Haashim.
Qoraal kasoo baxay Xafiiska Guddoomiyaha Aqalka Sare ayaa lagu sheegay in ujeedka Danjiraha uu ahaa salaan sharafeed iyo hambalyo ku aaddan dib u doorashada Guddoomiyaha Aqalka Sare Senator Cabdi Xaashi.
Guddoomiyaha iyo Danjiraha ayaa waxaa ay ka wada hadleen adkaynta xiriirka labada Dal, in Dowladda Qatar kaalin mug leh ka qaadato gurmadka abaaraha ba’an ee haatan ka jira dalka, iyo sidoo kale in la dhiso xiriir wax tar leh oo wada shaqayneed oo ay wada yeeshaan Golayaasha Sharci dejin ee labada Dal.
Kulanka waxaa kale oo goobjoog ahaa Guddoomiye Ku-xigeenka Kowaad ee Aqalka Sare Cali Shacbaan Ibraahim iyo Xoghayaha Guud ee Aqalka Sare Mudane Cali Maxamed Jaamac.
Danjiraha Dowladda Qatar u fadhiya Soomaaliya Danjire Xasan Bin Xamze Haashim ayaa sheegay in dowladdiisa ay kordhin doonto taageerada dhinac walba oo ay siiso Soomaaliya gaar ahaan dowladda Cusub ee uu hoggaamiyo Madaxweyne Xasan Sheekh Maxamuud.
Dowladda Qatar ayaa Shantii Sano ee la soo dhaafay siweyn u taageeri jirtay dowladda Federaalka ah ee Soomaaliya, waxaana sigaar ah loogu tirinayay inay saaxiib dhow la aheyd Madaxweynihii hore ee Soomaaliya Maxamed Cabdullaahi Farmaajo.
