Ugu yaraan 3 qof ayaa la dilay, 5 kalena wey dhaawacmeen Toogasho xalay oo Isniin ahayd ka dhacday Jaamacadda Michigan State University (MSU) ee dalka Maraykanka.
Toogashadaasi waxay 8:15 Fiidnimo ee xalay (xilliga dalkaasi) ka dhacday meel u dhow Berkey Hall ee bariga Kambaska Lansing Campus ee Jaamacadda MSU.
Boliska waxay sheegeen in 2 qof lagu dilay toogasho ka dhacday Berkey Hall, halka qof kalena ku dhintay Dhismaha the Union Building.
Mar sii horeysay Boliska waxay soo bandhigeen Sawirka Nin hubeysan, kaasi oo la rumeysan yahay inuu keligiisa geystay Toogashadaasi.
Baadi-goob socday 3 saacadood kadib, Boliska waxay xaqiijiyeen inay maydka Dableygii ka heleen bannaanka Jaamacadda, isla markaana uu u muuqday inuu u dhintay dhaawac uu isaga isku geystay.
Boliska waxay kaloo tilmaameen inaysan kala caddayn inuu Dablayga wax xiriir ah la lahaa Jaamacadda MSU ee uu dilka ka geystay.
Dhanka kale, Ku-xigeenka Boliska Jaamacadda MSU, Chris Rizman waxa uu sheegay in la joojiyey Waxbarashada Jaamacadda muddo 48 saacadood, waxaana socda Baaritaanka dhacdadaasi.
Toogashadii xalay ka dhacday Jaamacadda MSU waxay ku soo beegantay 14 bilood kadib, Toogasho Wadareed bishii November 30-dii ee sanadkii 2021-kii ka dhacday Dugsiga Oxford High School ee Gobalka Oakland, Michigan oo 80 miles dhanka Bari kaga toosan magaalladda East Lansing oo ka tirsan isla Gobalkaasi.
Arday 15 jir ah ayaa rasaas ku furay Arday ay isku Fasal ahaayeen, isagoo dilay 4 Arday, halka ay ku dhaawacmeen 6 Arday iyo Macalinkooda.